Србија ќе го добие својот прв индустриско-хемиски парк, кој ќе се развива во Прахово на површина од околу 330 хектари, како дел од инвестицискиот циклус „Прахово 2027“ вреден повеќе од 500 милиони евра. Проектот на „Еликсир Груп“ предвидува изградба на четири нови технолошки поврзани фабрики и трансформација на постојниот комплекс во модерен, енергетски ефикасен и технолошки интегриран индустриски центар.
Од 2012 година, инвестициите на групацијата во производствени капацитети, нови технологии и заштита на животната средина достигнале 730 милиони евра. Во следната фаза фокусот ќе биде ставен на интеграција на новите капацитети, поефикасно управување и дигитализација на производствените процеси.
Еден од клучните проекти е изградбата на постројка за претворање отпад во енергија, со капацитет за обработка до 100.000 тони отпад годишно и производство на 30 MW топлинска енергија. Со неа ќе се намали употребата на фосилни горива, ќе се зголеми енергетската независност на комплексот и ќе се придонесе за намалување на емисиите на CO₂.
Паралелно се планира и нова фабрика за кристални ѓубрива, во рамките на проектот TMAP, со која „Еликсир“ ќе го прошири портфолиото со производи со повисока додадена вредност наменети за современо и одржливо земјоделство.
Новиот индустриско-хемиски парк ќе функционира според модел на интегрирано управување со заедничката инфраструктура, енергетските системи, логистиката, одржувањето и безбедноста. Од вкупните 330 хектари, 134 хектари се предвидени за развој на нови содржини во рамките на паркот.
Со проектот, Прахово треба да прерасне во современ индустриски центар, во кој технолошкиот развој, енергетската ефикасност, циркуларната економија и декарбонизацијата ќе бидат основа за долгорочна конкурентност на регионалниот и европскиот пазар.
Фото – PickPik
