Монтреал, Канада, е прогласен за најбезбеден град во светот за патување во 2027 година, според новото истражување на компанијата Berkshire Hathaway Travel Protection. Девет европски градови се наоѓаат меѓу 15-те најбезбедни туристички дестинации, се наведува во студијата.
Монтреал го зазеде првото место, со 82,18 поени, искачувајќи се од 16-тото место на минатогодишната листа. Градот е особено пофален поради ниската стапка на криминал, додека сообраќајниот метеж е издвоен како еден од главните предизвици за посетителите.
Цирих е на второто место, со 81,03 поени, што го прави најбезбеден европски град за патување. По него следува Амстердам, со 80,81 поени, кој исто така напредуваше за една позиција во споредба со претходната година.
Според студијата, Цирих го должи својот висок пласман на безбедниот и чист јавен превоз, додека Амстердам се смета за исклучително безбеден и покрај големиот број туристи.
Првите пет места ги заокружуваат Токио на четвртото и Рејкјавик на петтото место, со 78,90 поени.
На листата се наоѓаат и Осло на шестото место, Сингапур на седмото, Венеција на осмото, Сиднеј на деветтото и Хонолулу на десеттото место.
Преостанатите пет места ги заземаат Даблин, Копенхаген, Барселона, Сан Франциско и Париз. Истражувањето е спроведено меѓу повеќе од 1.500 испитаници, кои ја оценувале безбедноста на градовите што самите ги посетиле. Првичниот избор опфати 38 популарни домашни и меѓународни дестинации меѓу американските патници.
(Klix.ba)
(фото: PExels/Steve Chai)
