Во Конгресот на САД беше презентиран нов законски предлог, кој има за цел да ја скрати стандардната работна недела од 40 на 32 часа.
Иницијативата на сенаторот Берни Сандерс и конгресменот Марк Такано предвидува вработените да бидат платени прекувремено за секој работен ден подолг од осум часа. Промената би се вовела постепено во текот на четири години, пишува The Independent.
Иако предлогот предвидува 32-часовна работна недела, се поставува прашањето дали ова е навистина идеална мерка. Економистите од Универзитетот Дјук откриле дека „оптималната“ работна недела за благосостојбата на вработените е поблиску до 37 часа. Сепак, тие истакнуваат дека позитивното влијание врз квалитетот на животот би се почувствувало дури и со 32-часовна работна недела.
„Нивото на подобрување на квалитетот на животот зависи првенствено од тоа дали овие промени директно влијаат на работниците кои моментално работат екстремно долги часови“, напишаа истражувачите во нивната студија од 2025 година. Тие ги темелеа своите заклучоци на податоци собрани од работници во Германија, кои, како и Американците, често работат повеќе од 40 часа неделно.
Податоците покажуваат значителна разлика во работните навики. Студија од 2016 година на Државниот универзитет во Аризона покажа дека американските работници поминуваат дури една четвртина од своето време на работа отколку европските работници. Според извештајот на Галуп од 2025 година, просечниот Американец со полно работно време во 2024 година работел околу 43 часа неделно. Стандардот од 40 работни часа неделно во САД е на сила од 1940 година, кога беше изменет Законот за фер работни стандарди.
Влијание врз здравјето и продуктивноста
Експертите предупредуваат дека работните недели од 40 или повеќе часа можат да имаат негативни последици. Долгорочната работа е поврзана со зголемен ризик од мозочен удар и кардиоваскуларни заболувања. Студија спроведена во Франција во 2019 година покажа дека луѓето кои работат во просек најмалку еден десетчасовен работен ден неделно имаат за една третина поголем ризик од мозочен удар во споредба со оние кои не работат редовно подолго време. Тој ризик беше најизразен кај луѓе под 50 години.
Освен здравјето, подолгото работно време влијае и на ефикасноста. Студија на Универзитетот Стенфорд од 2013 година покажува дека продуктивноста почнува да опаѓа по 50 часа неделно. „Автомобилот не работи најдобро кога резервоарот му е празен“, објасни психологот д-р Адам Борланд од клиниката Кливленд минатата година.
(B92)
Фото – Pix4free
