Генетски анализи со кои ќе се предвиди однесувањето на туморот, но и ефектот од терапијата која ја прима онколошкиот пациент – ќе се прават на Природно-математичкиот факултет во Скопје, во лабораторијата за молекуларна биологија и геномикa.
Анализите ќе овозможат прецизно и навремено детектирање на генски мутации, клучни за изборот на онколошка терапија, но и следење на текот на болеста, како и други важни клинички параметри.
„Генерално постои тренд да се користат овие анализи за предвидување на она што го викаме биолошкото однесување на туморот, значи како ќе реагира на постоечката терапија, на таргетираната целна терапија која се почесто се применува за среќа и кај нас благодарејќи на Фондот меѓутоа која е исклучително скапа и во тој поглед без да се направат детални генетски анализи користењето на таква терапија не само што е огромен трошок за Фондот туку може да биде проблематично и за пациентот доколку ја нема мутацијата на која таргетираниот лек делува. Во тој случај не само што може да се случи да не делува воопшто туку може да има дури и спротивен ефект“, изјави Проф. Сашо Панов, раководител на Лабораторија за молекуларна биологија и геномикa .
Овие анализи ќе бидат достапни откако ќе завршат тендерските процедури кои се во тек за набавка на потребните реагенси.
Директорот на Фондот за здравствено осигурување очекува со ова да се зголеми достапноста на вакви напредни анализи за онколошките пациенти, но и да се намалат листите на чекање за вакви здравствени услуги.
Дополнително планот на Фондот е во иднина да се воведат и анализи со кои при ин-витро процедури ќе се утврдува дали ембрионот е здрав пред да биде ставен во матката на мајката, со што ќе се намали ризикот од генетски заболувања.
(ТВ 24)
