Илон Маск верува дека штедењето за пензија би можело да стане целосно ирелевантно во следните 10 до 20 години, ако неговите предвидувања за развојот на технологијата се остварат. Во гостувањето во подкастот „Moonshots with Peter Diamandis“ тој рече дека брзиот напредок на вештачката интелигенција, роботиката и енергетските системи би можел да доведе до свет на изобилство, во кој секој би имал пристап до сè што му е потребно, без финансиски ограничувања.
Според визијата на Маск, екстремниот раст на продуктивноста би овозможил она што тој го нарекува „универзален висок приход“, каде што луѓето би имале пристап до врвна здравствена заштита, образование и стоки, без денешните бариери. Таквото општество, вели тој, би значело крај на недостигот и слободен пристап до знаење и услуги за сите.
Сепак, Маск предупредува дека патот до таква иднина нема да биде без проблеми. Транзицискиот период би можел да биде обележан со големи социјални превирања, нестабилност и губење на целта, бидејќи многу работни места би ја изгубиле својата важност. Исто така, се поставува прашањето за значењето на работата во свет каде што основните потреби се целосно задоволени.
Оваа оптимистичка визија е во остра спротивност со сегашната реалност. Голем број луѓе веќе се борат со растечките трошоци за живот, скапите проблеми со образованието, здравствената заштита и домувањето. Истражувањата покажуваат дека повеќето граѓани не штедат доволно за пензионирање, а економската неизвесност дополнително го засилува стравот од иднината.
Затоа изјавите на Маск предизвикаа поделени реакции. Додека некои ја гледаат неговата прогноза како увид во технолошката иднина, други го сметаат за опасен совет, бидејќи откажувањето од штедење би можело да има сериозни последици ако таквото сценарио не се оствари.
Во овој контекст, пораката на Маск повеќе личи на филозофска рефлексија за можниот развој на светот отколку на практичен финансиски совет за денешните околности.
(Business Insider)
