По рекордната 2025 година, во која златото порасна за речиси 70 проценти, кршејќи повеќе од 50 историски максимуми и надминувајќи 4.500 долари за унца, аналитичарите и инвеститорите очекуваат цената на жолтиот метал да продолжи со својот тренд на раст во 2026 година. Тие проценуваат дека би можела да достигне 5.500 долари за унца оваа година.
Како што велат трговците со инвестициско злато, сè поголем број инвеститори се свртуваат кон физичкото злато како инструмент за зачувување на капиталот, особено во услови на инфлаторни притисоци и валутна неизвесност. Во исто време, повисоките нивоа на цени ги мотивираа некои постоечки инвеститори да продаваат, а беше забележан и значителен прилив на инвеститори кои инвестираат за прв пат.
Минатата година започна со цена од 2.600 долари за унца, а потоа по кратката корекција предизвикана од најавата за нова фаза од трговската војна со Кина, цената на златото брзо се опорави и остана помеѓу 3.200 и 3.400 долари во текот на летото. На крајот на август, таа започна нов пораст кон рекордно ниво во декември.
Според моделот на Светскиот совет за злато, од вкупниот годишен раст на цената на златото од речиси 70 проценти, 12 процентни поени можат да се објаснат со геополитичката средина со висок ризик, 10 со слабиот долар и пониските каматни стапки, додека 9 процентни поени се припишуваат на влезот на нови инвеститори на пазарот поради зголемувањето на цените.
(Bizlife)
