Според анализата на компанијата „Кплер“, вкупно 10,3 проценти од глобалната поморска трговија со дизел поминува низ Ормутскиот теснец, како и 19,4 проценти од вкупната трговија со авионско гориво и 16 проценти од трговијата со бензин и нафта по море, пресмета компанијата. Цените на дизелот надминаа 200 долари за барел на лондонскиот пазар во четврток, достигнувајќи ги највисоките нивоа од 2022 година, под влијание на стравувањата дека војната меѓу САД и Израел против Иран би можела да се одолговлекува.
Референтните цени на дизелот во фјучерс договорите изнесуваа 1.527 долари за тон попладне и беа речиси 12 проценти повисоки отколку на крајот од тргувањето вчера. Тоа е еквивалент на нешто над 206 долари за барел.
Скокот на цената на дизелот е последица на прекинот на транзитот низ Ормутскиот теснец, што ја запре испораката на милиони барели рафинирани производи на глобалниот пазар.
Од почетокот на американско-израелската војна со Иран на крајот на февруари, цените на дизелот на светските пазари пораснаа посилно од цените на суровата нафта, што сигнализира конкуренција на купувачите за горивото што се користи во транспортот на стоки, како и во индустријата.
Шефот на Меѓународната агенција за енергија (IEA), Фатих Бирол, предупреди во среда дека Европа може да доживее недостиг на дизел и гориво за авиони најдоцна во мај. „Го гледаме (дефицитот) во Азија, но наскоро, мислам, во април или мај, и Европа ќе го почувствува тоа“, предупреди во среда шефот на Меѓународната агенција за енергија (IEA), Фатих Бирол.
Во Азија, цените на дизелот накратко надминаа 200 долари за барел во четврток, според податоците од Блумберг. Европа планира да пласира на пазарот 73 милиони барели нафтени производи и околу 35 милиони барели сурова нафта од крајот на март, покажаа податоците на IEA објавени на 15 март.
Нападите од украински беспилотни летала врз руските пристаништа и рафинерии претставуваа закана за уште еден извор на снабдување. Русија е еден од главните извозници на дизел, но до јули само на производителите им е дозволено да го продаваат на странски клиенти.
Шефот на ИЕА предупреди дека околу 40 клучни енергетски објекти на Блискиот Исток се оштетени од почетокот на војната и дека ќе биде потребно време за да се вратат во функција. „Ни се заканува многу големо нарушување, најголемо во историјата“, заклучува Бирол.
(Poslovni dnevnik)
Фото – Peak-px
