Форд јасно стави до знаење дека сака целосно да го промени правецот на развој на своите возила, фокусирајќи се на модели кои евоцираат емоции и имаат силен идентитет, наместо на она што компанијата го нарекува „здодевни“ автомобили без карактер.
Според порталот Motor1, раководителите на американскиот производител веруваат дека иднината на компанијата не е во производство на генерички возила за масовниот пазар, туку во модели кои будат страст и ентузијазам кај клиентите. Извршниот директор на Форд, Џим Фарли, претходно изјави дека компанијата сака да се повлекува од „бизнисот со здодевни автомобили“ и да се сврти кон производство на иконски модели.
Една од најзначајните изјави дојде од потпретседателот на Форд за развој на производи, Џим Баумбик, кој рече дека компанијата нема намера да произведува возила без лице. „Не се обидуваме да правиме тостери на тркала“, рече Баумбик, додавајќи дека Форд сака автомобили кои евоцираат емоции кај возачот, а не само транспорт.
Тој истакна дека Форд повеќе не сака да развива „комерцијални производи без идентитет“, туку автомобили кои имаат јасна намена и силен карактер.
Новата стратегија веќе може да се види преку моделите што Форд агресивно ги промовираше во последните години. Компанијата сè повеќе инвестира во линијата возила Форд Мустанг, Форд Бронко и Раптор, кои станаа симбол на перформансите и авантуристичкиот дух на брендот. Фарли претходно изјави дека Форд сака да стане „Порше на теренските возила“, нагласувајќи ја амбицијата на компанијата да доминира во теренскиот сегмент.
Форд воведе низа специјални и спортски верзии на своите модели во последните години, вклучувајќи ги Форд Мустанг ГТД, Форд Бронко Раптор и Форд Ренџер Раптор, а во исто време се повлекува од производството на одредени класични патнички автомобили како што се Форд Фиеста и Форд Мондео.
Иако Форд продолжува да развива електрични возила, компанијата признава дека големите електрични теренци и моделите пикап претставуваат сериозен предизвик поради високата цена и сложеното производство. Фарли претходно предупреди дека големите електрични модели имаат „скоро непремостливи економски проблеми“, особено кога станува збор за возила што мора да влечат товар, да возат на долги растојанија или да се користат надвор од патот.
Затоа Форд планира да се фокусира повеќе на мали и средни електрични модели, како и на хибриди и возила со продолжен дострел, додека големите теренци и пикапи веројатно ќе ги задржат бензинските мотори долго време.
Извор: BIZLife
Фото – Flickr
