Францускиот претседател Емануел Макрон изјави дека Норвешка се согласила да се придружи на францускиот нуклеарен чадор, со што стана најновата земја што добива француска нуклеарна заштита.
“Вие дадовте согласност Норвешка да се придружи на она што го нарековме проширено нуклеарно одвраќање. Тоа е многу важен чекор во нашето партнерство и ќе биде почеток на многу амбициозна соработка“, рече францускиот претседател во Елисејската палата.
„Норвешка, географски и стратешки клучен партнер со кого веќе имаме важна соработка во заштитата на територијата на сојузниците од надворешни закани, ќе претставува голема додадена вредност за оваa проширенa одбрана“, додаде тој.
Во март Франција понуди да ја прошири својата нуклеарна заштита на други европски земји.
Според Telegraph, сè повеќе европски земји се подготвени да учествуваат во француската иницијатива. Велика Британија и Франција минатата година потпишаа декларација за координација на нуклеарните капацитети и операции, а слични договори се постигнати и со Полска и Германија. Холандија, Белгија, Грција, Шведска и Данска се исто така подготвени да се приклучат на рамката, што би вклучувало заеднички вежби и евентуално примање на француски „Рафали“ на нивните територии.
Шпанија и Италија досега одбиваат да учествуваат. Чешкиот премиер Андреј Бабиш, исто така покажа подготвеност да се придружи, иако на изборите се кандидираше врз основа на проруски пораки.
Германскиот канцелар Фридрих Мерц ја поддржа дискусијата за европскa нуклеарнa одбрана. На Германија не ѝ е дозволено да развива сопствено нуклеарно оружје според обврските преземени како дел од договорот што ѝ овозможи на земјата повторно да се обедини и според Договорот за неширење на нуклеарно оружје. Но, Мерц рече дека ова не ги спречува разговорите за заеднички решенија со партнерите, особено со Франција и Обединетото Кралство, единствените нуклеарни сили во Европа.
(N1/Index.hr)
