Најскапите пазари на недвижности во Европа се сместени во изненадувачки мал агол од континентот. Најновите податоци од „Глобален водич за недвижности“ покажуваат дека четири од петте најскапи градови за купување недвижности се во Швајцарија и Луксембург, додека швајцарскиот град Цирих го држи убедливо првото место со просечна цена што надминува вртоглави 18.000 евра по квадратен метар.
За купувачите на недвижности, овие градови одамна престанаа да бидат класични пазари на недвижности, туку прилично ретки и ултралуксузни инвестициски имоти.
Подолу е официјалната ранг-листа со десерте најскапи пазари на недвижности во Европа:
10.Стокхолм (Шведска) – 8.380 евра/м²
Шведската престолнина бележи едно од најјасните закрепнувања на пазарот на недвижности во Европа. Цените на становите се зголемија за 7,2% во споредба со минатата година, што е сериозен пресврт по острата корекција што ја погоди Шведска во 2022 година кога каматните стапки скокнаа.
Остатокот од земјата е значително поевтин, во Гетеборг квадратен метар чини во просек 4.428 евра, а во Малме 3.369 евра.
9.Копенхаген (Данска) – 8.405 евра/м²
Данската престолнина е исто така најбрзорастечкиот пазар на оваа листа. Цените на становите скокнаа за дури 14,3% за една година, или неверојатни 24% за период од две години. Контрастот со остатокот од Данска е огромен, бидејќи во вториот по големина град, Архус, цените паднаа на 4.128 евра за квадратен метар.
8.Осло (Норвешка) – 9.332 евра/м²
Главниот град на Норвешка ја комбинира модерната нордиска архитектура со едни од највисоките приходи на домаќинствата на континентот. Цените на квадратен метар скокнаа за 6,3% за една година, но другите градови сега го преземаат водството, а Берген бележи зголемување од 22,4% (на 6.160 евра/м²).
7.Амстердам (Холандија) – 9.437 евра/м²
Хроничниот недостиг на домување, строгите правила за планирање и силната меѓународна побарувачка продолжуваат да ги зголемуваат цените во Амстердам. Забележан е годишен раст од 13%, а историскиот каналски округ од 17 век стана една од најскапите станбени адреси во Европа.
6.Париз (Франција) – 9.490 евра/м²
Париз останува еден од најпрепознатливите пазари на недвижности во светот, но за разлика од повеќето градови на оваа листа – цените тука паѓаат. Тие паднаа за 0,3% на годишно ниво и за дури 7,3% во последните две години. Очекуваното постолимписко закрепнување сè уште не се материјализирало, а повисоките трошоци за позајмување продолжуваат да влијаат врз побарувачката.
5.Берн (Швајцарија) – 9.952 евра/м²
Берн е најпотценет пазар на луксуз во Швајцарија. Федералниот главен град е најевтин од четирите швајцарски градови на оваа листа, иако цените се малку под 10.000 евра за квадратен метар. Стабилноста на пазарот е поткрепена од големото богатство на домаќинствата и ограничената понуда.
4.Луксембург (Луксембург) – 10.941 евра/м²
Луксембург, најбогатата земја во Европа според БДП по глава на жител, е дом на еден од најскапите пазари. И покрај малиот пад од 0,9% поради заладување по една деценија екстремни зголемувања, Луксембург останува еден од ретките градови каде што стандарден стан со една спална соба лесно може да чини повеќе од милион евра.
3.Луцерн (Швајцарија) – 12.066 евра/м²
Луцерн е веројатно најголемото изненадување на листата. Иако е значително помал по површина и население од Цирих или Женева, неговата спектакуларна локација на езеро во подножјето на Алпите привлече домашни и странски купувачи, што ги зголеми цените на становите за 7,3% само во изминатата година.
2.Женева (Швајцарија) – 16.819 евра/м²
Дом на Обединетите нации, Светската здравствена организација, Црвениот крст и огромна концентрација на приватни банки, градот ги привлекува најплатените професионалци во светот. Цените бележат годишен пораст од 3,4%, а понудата на недвижности е исклучително ретка, што ја држи Женева на самиот врв на ексклузивност.
1.Цирих (Швајцарија) – 18.229 евра/м²
Цирих останува апсолутен шампион и најскап европски град за купување недвижности. И покрај веќе астрономски високата основа, цените се зголемија за уште 4,2% во изминатата година (или 11,7% за две години).
Дом на најголемите банки и берза во Швајцарија, градот комбинира финансиска моќ, политичка стабилност и хроничен недостиг на домување, поради што само дополнително ќе ја зголеми својата предност во однос на остатокот од Европа во 2026 година.
(Bizlife)
