Германскиот Allianz планира да укине помеѓу 1.500 и 1.800 работни места во својата единица за помош при патување и осигурување за патување Allianz Partners. Во исто време, го забрзува спроведувањето на решенија базирани на вештачка интелигенција.
Извршниот директор на Allianz Partners, Томас Кунцман, на настан во Минхен изјави дека намалувањето на бројот на вработени ќе се спроведе преку пријателски раскинувања на договори, предвремено пензионирање и други доброволни опции.
Преговори со претставници на вработените веќе се одржани во неколку европски земји, а програми за доброволно заминување им се понудени на работниците во Шпанија, Франција, Германија, Италија и земјите од Бенелукс.
„Ова може да му се случи на секого од нас во одреден момент“, рече Кунцман, додавајќи дека компанијата се обидува да се однесува кон вработените погодени од промените „фер и одговорно“.
Allianz Partners вработува повеќе од 22.000 луѓе ширум светот, а компанијата претходно предупреди дека трансформацијата на нејзиниот бизнис со помош на вештачка интелигенција може да влијае на бројот на вработени.
Воведувањето на технологии за вештачка интелигенција станува сè поважен фактор во реструктуирањето на големите компании. Аналитичарите проценуваат дека значителен дел од работните места во развиените економии би можеле да се променат поради автоматизацијата и примената на вештачката интелигенција.
(021)
