Микрон ќе инвестира дополнителни 3 милијарди долари за зајакнување на домашниот синџир на снабдување
Американскиот производител на мемориски чипови „Микрон Технолоџи“ денес објави дека ќе ги зголеми планираните инвестиции во производството во Соединетите Американски Држави на 250 милијарди долари, со цел да одговори на брзиот раст на побарувачката за мемориски чипови поттикнат од развојот на вештачката интелигенција.
Компанијата објави дека ќе инвестира дополнителни 50 милијарди долари до 2035 година, во споредба со претходно објавениот план од 200 милијарди долари, со што ќе ги прошири производствените капацитети во државите Њујорк, Ајдахо и Вирџинија.
Целта е да се произведуваат дури 40 проценти од DRAM меморијата во Соединетите Американски Држави до средината на следната деценија, објавува Танјуг.
Веста беше позитивно прифатена од пазарот, а акциите на „Микрон“ пораснаа за дури осум проценти на отворањето на американските берзи.
Акциите на компанијата пораснаа за повеќе од 250 проценти оваа година, поттикнати од силната побарувачка за мемориски чипови за центри за податоци и системи за вештачка интелигенција.
Бумот на инвестициите во инфраструктурата за вештачка интелигенција доведе до глобален недостиг на мемориски чипови, кои се неопходни за напредните процесори.
Како резултат на тоа, производителите на мемории го префрлија производството во најпрофитабилниот сегмент на пазарот, а последиците веќе се чувствуваат во другите индустрии.
Микрон, исто така, објави дека ќе инвестира дополнителни 3 милијарди долари за зајакнување на својот домашен синџир на снабдување. Најавеното проширување на инвестициите е дел од пошироката стратегија на САД за развој на домашната полупроводничка индустрија, иницирана со усвојувањето на Законот за чипови и наука, додека глобалната трка за производствен капацитет се интензивира.
Јужнокорејските конкуренти Самсунг Електроникс и СК Хајникс претходно објавија заеднички инвестиции од околу 880 милијарди долари во проширување на производството на чипови во наредните години.
(Politika.rs)
Фото – ipezone.blogspot.com
