Истражувачки тим од Колорадо создаде експериментални третмани за остеоартритис кои се чини дека ги регенерираат оштетените зглобови, а не само ја ублажуваат болката. Во студиите на животни една инјекција ги вратила артритичните зглобови во здрава состојба за само неколку недели, додека втора терапија ги поправила дефектите на ‘рскавицата и коските со искористување на сопствените клетки за лекување на телото.
Новите регенеративни терапии еден ден може да им овозможат на оштетените артритични зглобови сами да се излекуваат – потенцијално трансформирајќи го третманот од управување со болка во вистинско закрепнување.
Истражувачите од Универзитетот Боулдер во Колорадо, Универзитетот Аншуц и Државниот универзитет во Колорадо развија збир на експериментални третмани кои можат да помогнат во стареењето и оштетените зглобови сами да се поправат за неколку недели. Терапиите покажаа ветувачки резултати во студиите на животни, каде што ги поништија знаците на остеоартритис и го вратија здравјето на зглобовите.
Новите пристапи вклучуваат регенеративна инјекција дизајнирана да се администрира директно во зглобот, како и систем за поправка базиран на биоматеријали, кој ги охрабрува сопствените клетки на телото да ја обноват оштетената ‘рскавица.
Нивната студија неодамна доби голем поттик од федералната Агенција за напредни истражувачки проекти за здравство (ARPA-H), која објави дека тимот ќе продолжи кон следната фаза од проектот, вреден до 33,5 милиони долари. Истражувањето е дел од програмата ARPA-H Нови иновации за регенерација на ткивата кај остеоартритис (NITRO), предводена од менаџерот на програмата, д-р Рос Урих.
„За две години успеавме да преминеме од идеја до развој на овие терапии за да демонстрираме дека тие го поништуваат остеоартритисот кај животните. Нашата цел не е само да ја третираме болката и да ја запреме прогресијата, туку да ја ставиме крај на оваа болест.“, рече главниот истражувач, Стефани Брајант, професор по хемиско и биолошко инженерство на Универѐитетот Боулдер.
Остеоартритисот зафаќа приближно едно од шест лица над 30 години во светот. Состојбата постепено ја разградува ‘рскавицата, ткивото за амортизација, што ги спречува коските да тријат едни од други. Како што напредува болеста, може да ја оштети и коската, да ја промени структурата на зглобовите и да го направи секојдневното движење сè поболно.
Сегашните опции за третман се ограничени. Повеќето пациенти или ги контролираат симптомите преку ублажување на болката или на крајот се подложуваат на операција за замена на зглоб. Моментално нема лек за болеста.
Истражувачите од Колорадо следат две различни стратегии насочени кон промена на таа реалност.
Едниот третман го пренаменува постоечкиот лек, кој веќе доби одобрение од Администрацијата за храна и лекови. Брајант и нејзините колеги создадоа патентиран систем за испорака на честички кој може да се инјектира во зглоб, каде што ослободува периодични дози на лекот во текот на неколку месеци.
За пациенти со пообемно оштетување на ‘рскавицата или коската тимот разви посебна терапија, која се состои од инженерски создадени протеини. Кога се применува артроскопски, материјалот се стврднува на своето место и ги привлекува сопствените прогениторни клетки на телото за да ја поправи оштетената област.
Кога истражувачите го тестирале инјектираниот третман кај животни со остеоартритис и повреди на зглобовите, засегнатите зглобови се вратиле во здрава состојба во рок од четири до осум недели.
Материјалот за поправка, исто така, дал впечатливи резултати. Според Брајант, пополнувањето на дефектите во ‘рскавицата или коската довело до „целосна регенерација и поправка на дефектот“.
Терапиите, исто така, покажале регенеративни ефекти кај човечките клетки добиени од пациенти кои се подложени на процедури за замена на зглобови.
NITRO беше првата програма лансирана од ARPA-H и беше основана за развој на „минимално инвазивни терапевтски средства кои целосно ги регенерираат оштетените зглобови“. Пред две години програмата му додели на тимот од Колорадо до 33,5 милиони долари, во зависност од позитивните резултати, за да ја оствари таа цел.
Со успешното завршување на првата фаза, истражувачите сега напредуваа во втората фаза.
„Многу е возбудливо да се биде дел од првата програма на ARPA-H и да се биде еден од првите тимови што напредуваа во втората фаза“, рече Брајант.
Д-р Евалина Бургер, професорка и претседателка на Одделот за ортопедија на Универзитетот Аншуц, рече дека остеоартритисот ги погодува луѓето од сите сфери на животот. Таа видела како болеста влијае на бабите и дедовците кои се борат со едноставни секојдневни задачи поради болки во рамото, како и на спортисти принудени да се откажат од трчање, хокеј и други активности поради проблеми со коленото или грбот.
„Во моментов опциите за многу пациенти се или масивна, скапа операција или ништо. Нема многу помеѓу. Затоа ARPA-H е толку важен.“, рече Бургер, кој со интерес го следеше истражувањето на тимот.
Бургер и Брајант замислуваат иднина во која луѓето со остеоартритис во рана фаза би можеле да добијат прифатлив еднократен третман, кој ќе ги одржува нивните зглобови здрави со години. Пациентите со локализирани повреди на ‘рскавицата или коските би можеле потенцијално да го поправат оштетеното ткиво за време на една посета на ординација и брзо да се опорават.
Истражувачите планираат да ги објават резултатите од студијата врз животни во рецензирано списание подоцна оваа година. Тие исто така ја основаа компанијата Renovare Therapeutics Inc. за да помогнат во движењето на технологијата кон комерцијална употреба.
Доколку идните истражувања продолжат да даваат позитивни резултати, Брајант верува дека клиничките испитувања би можеле да започнат за 18 месеци.
„Ова би можело да биде вистинска пресвртница за пациентите“, рече Брајант.
(Science Daily)
(фото: Accelerate Therapy)
