Јужнокорејскиот технолошки гигант Самсунг Електроникс отпушти стотици вработени во своите подружници во САД кои произведуваат мобилни телефони, телевизори и друга потрошувачка електроника, додека го сели своето седиште од Њу Џерси во Тексас.
Според Ројтерс, преместувањето ќе влијае на 739 работни места во Њу Џерси. На повеќето од вработените им било понудено да продолжат да работат во Тексас, додека оние кои не го прифатиле преместувањето ги изгубиле своите работни места. Во исто време, канцеларијата на компанијата во Плејн, Тексас, отпуштила уште 100 работници, вклучувајќи ги и вработените во секторот за мобилни телефони.
Иако Самсунг тврди дека промените во персоналот се резултат на преместувањето на седиштето, отпуштањата доаѓаат во време кога бизнисот на компанијата сè повеќе се дели во два различни правци. Додека секторот за полупроводници бележи рекордни профити поради огромната побарувачка за чипови за вештачка интелигенција, делови од компанијата кои произведуваат мобилни телефони, телевизори и домашни апарати се соочуваат со зголемување на трошоците, пад на побарувачката и зголемување на конкуренцијата.
„Самсунг“ неодамна објави дека очекува оперативен профит до 19 пати поголем во вториот квартал, благодарение на силната продажба на чипови за вештачка интелигенција, како и дека планира нови инвестиции вредни стотици милијарди долари во развојот на производството на полупроводници.
Од друга страна, аналитичарите предупредуваат дека секторот за мобилни телефони би можел да забележи загуба за прв пат оваа година, поради притисокот од конкуренцијата од Apple, но и од кинеските производители како што се TCL и Hisense.
Документите што ги виде Ројтерс покажуваат дека уште на 30 јуни, Samsung ги известил вработените за „отпуштања на ниво на целата компанија“, предупредувајќи дека последиците би биле значителни. Сепак, компанијата негира дека станува збор за пошироко глобално реструктуирање.
Samsung вели дека целта на преместувањето на седиштето во Тексас е да се зајакне соработката меѓу тимовите и подобро да се позиционира компанијата во брзорастечката област на вештачката интелигенција.
(Seebiz)
Фото – Roboflow Universe
