Групацијата Фолксваген планира постепено да го затвори шпанскиот бренд за автомобили Сеат најдоцна до крајот на 2029 година, што би бил еден од најзначајните потези во рамките на големата програма за штедење и реструктуирање на најголемиот европски производител на автомобили.
Според извештајот на германскиот весник Wirschaftsvohe, раководството на Фолксваген веќе утврдило временски план за затворање на брендот, а надзорниот одбор на компанијата треба да гласа за предлогот во петок. Сеат повеќе не е во планираната структура на Групацијата Фолксваген за 2030 година, објавува Business and Finance.
Причината за затворањето е потребата од намалување на сложеноста на бизнисот и инвестицискиот товар во рамките на таканаречената Core група, која ги вклучува Фолксваген, Шкода, Сеат и Купра. Според објаснувањето на раководството, продолжувањето на бизнисот на Сеат (акроним за Sociedad Española de Automóviles de Turismo) во сегашната форма би барало дополнителни ресурси, додека компанијата сака стратешкиот развој во оваа групација да го фокусира првенствено на брендот Купра.
Фолксваген истовремено се соочува со силен притисок од кинеските производители на автомобили на европскиот пазар, проблеми на кинескиот пазар и американски царини. Извршниот директор Оливер Блуме се обидува да ги намали трошоците преку програма за штедење и да го прилагоди работењето на новите пазарни услови. Одлуката за Сеат доаѓа во време кога Фолксваген ја разгледува и иднината на своите германски фабрики.
Надзорниот одбор треба да ја разгледа долгорочната перспектива на фабриките во Цвикау, Емден, Хановер и Некарзулм, како и можноста за понатамошно намалување на бројот на вработени низ целиот свет.
(Nova ekonomija)
