Општините преку платформата мЗаедница добиваат алатка за транспарентни консултации, а граѓаните можност директно да влијаат врз локалните политики
Во време кога граѓанската вклученост во процесите на донесување одлуки на локално ниво останува ниска, дигиталната платформа мЗаедница отвора нов простор за поактивно учество на граѓаните преку јавни анкети, консултации и директна комуникација со општините.
Новата функционалност им овозможува на општините едноставно да креираат анкети и да спроведуваат јавни консултации за прашања од интерес на граѓаните, додека жителите преку мобилен телефон или компјутер можат брзо и лесно да гласаат, да дадат свое мислење и да предложат решенија за локалните политики и иницијативи.
мЗаедница е достапна во повеќе општини низ државата, меѓу кои Карпош, Аеродром, Крива Паланка, Македонска Каменица, Кочани, Штип, Валандово, Гостивар, Струга, Неготино и Демир Хисар. Со новите функционалности за дигитални анкети и јавни консултации, платформата им овозможува на општините на едноставен начин да го слушнат мислењето на граѓаните, да ги вклучат во креирањето локални политики и да ја зајакнат двонасочната комуникација со заедницата.
Во рамки на проектот ДИГИЛОК, посебен фокус беше ставен на проширувањето на мЗаедница во Струга, Демир Хисар и Неготино, како и на поддршката на општините за користење на новите можности за јавни консултации. Преку платформата, граѓаните можат полесно да учествуваат во анкети и консултации, да дадат свое мислење или предлог и директно да придонесат кон креирањето подобри локални решенија.
Дополнително, општините кои се дел од мЗаедница се рангирани меѓу најотворените и најтранспарентните општини во државата, според „Индексот на отвореност на локалната самоуправа“, што покажува дека дигиталните алатки можат директно да придонесат за поотворено и поодговорно локално управување.
Според повеќе домашни и меѓународни анализи за локалното владеење, учеството на граѓаните во јавните консултации и процесите на донесување одлуки во општините е сè уште на ниско ниво, а дел од консултативните процеси остануваат недоволно видливи и достапни за јавноста. Токму затоа, дигиталните решенија како мЗаедница имаат клучна улога во приближување на институциите до граѓаните и поттикнување поактивна граѓанско учество.
„мЗаедница е создадена со цел да им помогне на општините да воспостават поотворена, транспарентна и двонасочна комуникација со граѓаните. Преку дигиталните консултации, сакаме учеството да биде поедноставно и подостапно, а граѓаните да имаат реална можност да го споделат своето мислење за одлуките што влијаат врз нивното секојдневие“, велат од Центарот за социјални иновации Блинк 42-21, креатор и развивач на платформата.
Новата функционалност е развиена во рамки на проектот „ДИГИЛОК – Дигитална трансформација на локално ниво: вклучена заедница за отпорност на корупција“, кој Центарот за социјални иновации Блинк 42-21 го реализира во соработка со Фондацијата Метаморфозис и Рурална коалиција, со поддршка од програмата Цивика мобилитас и Владата на Швајцарија.
Проектот има за цел да ги зајакне транспарентноста, отчетноста и учеството на граѓаните во носењето одлуки на локално ниво, преку користење иновативни дигитални алатки и унапредување на отвореноста на локалните власти.
мЗаедница е достапна бесплатно преку мобилна апликација и веб платформа, овозможувајќи им на граѓаните во секое време да бидат информирани, консултирани и активно вклучени во развојот на својата општина.
Мобилната апликација е достапна за Android преку Google Play Store: (https://goo.gl/Y9qhpE), за iOS преку App Store: (https://apple.co/2SbERqJ) и на десктоп преку следниот линк – www.mzaednica.mk
Повеќе информации за платформата и тековните активности се достапни на:
https://www.facebook.com/blink4221/
https://www.facebook.com/mZaednica/
