Технолошкиот гигант Google потпиша долгорочен договор за купување електрична енергија со финската компанија Fortum. Договорот опфаќа до 50% од капацитетот на нуклеарната централа Loviisa и обезбедува финансиска сигурност за зголемување на капацитетот и продолжување на работниот век на централата до 2050 година.
Договорот за купување електрична енергија (PPA) меѓу Fortum и Google го опфаќа периодот на продолжен работен век на нуклеарната централа Loviisa. Договорот ќе стапи на сила во 2028 година со намален капацитет, а во периодот од 2030 до 2049 година ќе опфаќа 50% од капацитетот на централата. Овој договор следи по најавата на Google дека во текот на следните две години (2027–2028) ќе инвестира 13 милијарди евра (15 милијарди американски долари) во центри за податоци и придружна инфраструктура во Финска, како и во партнерства во Хамина, Мухос, Ваала и Кајани.
Loviisa, која се состои од два реактора со вода под притисок од типот VVER-440, беше првата нуклеарна централа во Финска и моментално обезбедува повеќе од 10% од електричната енергија во земјата. Првиот блок на Loviisa започна со комерцијална работа во 1977 година, а вториот блок во 1981 година. Во февруари 2023 година финската влада на Fortum му одобри продолжување на дозволата за работа за двата блока, овозможувајќи ѝ на централата да продолжи со производство на електрична енергија до крајот на 2050 година.
Fortum спроведува инвестициска програма во Loviisa вредна околу 1 милијарда евра, чија цел е продолжување на работата на централата до 2050 година. Во моментов за околу 80% од проектите потребни за продолжување на работниот век и за инвестиции во вредност од 700 милиони евра, сè уште нема донесено инвестициска одлука. Од Fortum изјавија дека договорот со Google ќе обезбеди предвидлив прилив на приходи, што ќе овозможи завршување на инвестициите за продолжување на работниот век на Loviisa. Исто така, се очекува договорот да овозможи ново зголемување на капацитетот за 10 MWe. Во тек е зголемување на капацитетот на централата за 38 MWe, а се очекува тоа да биде завршено во 2028 година.
„Без значителни инвестиции за продолжување на работниот век, централата не би можела да продолжи со производство на електрична енергија без фосилни горива по 2030 година. Нејзиното задржување во функција во наредните децении ќе помогне да се стабилизираат цените на електричната енергија и ќе ја поддржи долгорочната отпорност на финската електроенергетска мрежа“ изјавија од Fortum.
Од Google изјавија: „Задржувањето на овој капацитет за чиста енергија во функција ќе помогне да се обезбеди пристап до сигурна и достапна електрична енергија за финските домаќинства, бизнисите и индустриските потрошувачи. Исто така, ќе соработуваме со Fortum за да ги идентификуваме потенцијалните можности за развој на нови нуклеарни реактори во Loviisa.“
„Горди сме што Финска е наш дом во изминатите 15 години. Додека ги прошируваме нашите операции во Финска, од клучно значење е да соработуваме со локални енергетски партнери како Fortum за да го зголемиме нашето разбирање за тоа што ѝ е потребно на мрежата и да инвестираме во енергетски решенија што обезбедуваат долгорочна отпорност и прифатливост за сите корисници на електрична енергија. Со поддршка на продолжувањето на животниот век на електраната Loviisa, ние го правиме својот дел за зачувување на критичен извор на енергија во електричната мрежа. Централата се наоѓа во близина на нашиот центар за податоци Хамина, каде што се вкоренивме кога дојдовме во Финска. Како што растеме, соработуваме со Fortum и други партнери за да донесеме нов капацитет за производство на обновлива енергија и флексибилни решенија во финскиот електроенергетски систем. Нашата цел е да бидеме пионери во тоа како вештачката интелигенција е одговорно интегрирана во европските енергетски системи.“ изјави Арис Карканиас, раководител за енергетика во регионот EMEA во Google.
Дополнително, Google и Fortum потпишаа меморандум за разбирање за соработка за поддршка на растот на двете компании во Финска и за да донесат повеќе производство на електрична енергија во Финска за да ги задоволат потребите на електричната мрежа, домаќинствата и бизнисите. Компаниите имаат намера да ја продлабочат својата соработка во развојот на нови нуклеарни енергетски решенија, обновлива енергија и флексибилни решенија. Меморандумот за разбирање има за цел да обезбеди дека со зголемувањето на побарувачката за услуги за вештачка интелигенција, ќе се распореди ново нискојаглеродно производство за да се поддржи долгорочното снабдување со електрична енергија на финските потрошувачи и бизниси.
(World Nuclear News)
(фото: Needpix)
