Цените на нафтата пораснаа во понеделник откако земјите од Персискиот Залив го одложија состанокот со Иран за превозот низ Ормускиот теснец, додека Саудиска Арабија затвори клучен нафтовод по нападот со беспилотни летала.
Меѓународната референтна цена на нафтата се зголеми за 3,5 проценти на повеќе од 108 долари за барел. Растот следеше по понатамошните прекини во снабдувањето од регионот и застојот во дипломатските напори за смирување на тензиите околу еден од најважните светски превозни правци.
Иран и арапските земји требаше да се сретнат во Оман за да разговараат за привремен договор меѓу Техеран и Мускат за управување со навигацијата низ теснецот.
Сепак, министерот за надворешни работи на Оман, Бадр Албусаиди, објави дека состанокот е одложен „во интерес на консензус“.
„Остануваме посветени на поттикнување дијалог што ја поддржува стабилноста и трајната соработка во нашиот регион“, додаде Албусаиди.
Тензиите се зголемија откако Саудиска Арабија го затвори својот нафтовод исток-запад по нападот со беспилотни летала врз нафтената инфраструктура на кралството минатата недела.
Овој пат стана особено важен за саудискиот извоз откако Иран го ограничи бродскиот сообраќај низ Ормутскиот теснец кон крајот на февруари, по почетокот на војната што ја започнаа САД и Израел против Исламската Република.
Дипломатите предупредуваат дека само регионален договор нема да биде доволен за целосно отворање на преминот. За потрајно решение, како што е наведено, ќе мора да се постигне договор и од Вашингтон и од Техеран, особено по меѓусебните обвинувања дека е прекршен меморандумот за разбирање потпишан во јуни.
Фотот – Wikimedia
