Европската Унија планира да предложи забрана за користење социјални мрежи, платформи за споделување видеа, чет-ботови со вештачка интелигенција и онлајн игри за лица помлади од 15 години. Овој потег е дел од најсеопфатниот план досега, чија цел е заштита на децата од опасностите на интернет, според документ на Европската комисија во кој увид имала агенцијата Reuters.
„Пристапот на Унијата треба да им овозможи на малолетниците да го искористат огромниот потенцијал на дигиталните услуги, а истовремено да ги заштити од злоупотреба и експлоатација. Од суштинско значење е да се ограничи пристапот на технолошките компании до нашите деца, а не обратно“, се наведува во документот.
Предлогот на ЕУ е дел од иницијативата „Закон на ЕУ за децата“ (EU Child Act), која во четврток ќе ја претстават претседателката на Европската комисија, Урсула фон дер Лајен, и европската комесарка за технологија, Хена Виркунен. Се очекува Фон дер Лајен да ги изнесе конкретните детали за претстојната политика на ЕУ во среда, за време на нејзиниот говор за состојбата на Унијата.
Предлогот на Комисијата – кој ќе ги опфати и платформите за видеоигри – предвидува постепен пристап до различни услуги врз основа на возраста, при што на компаниите ќе им се наметнат обврски во зависност од видот на услугата и возраста на децата.
Според документот, од компаниите ќе се бара да плаќаат надомест за надзор со цел финансирање на спроведувањето на прописите и контролата од страна на регулаторните тела. Според овој предлог, децата постари од 15 години ќе можат сами да отвораат сметки, додека децата на возраст од 13 и 14 години ќе можат да побараат од родителите да им отворат воведни сметки за социјални мрежи и платформи за споделување видеа, под услов да постои родителски надзор, ограничени права за контакт и строги временски ограничувања.
Сметките за деца на возраст од три до 12 години целосно ќе бидат управувани од родителите и ќе бидат наменети исклучиво за услуги прилагодени за деца, кои ги исполнуваат строгите безбедносни стандарди, се наведува во документот. Децата помлади од три години нема да имаат пристап до овие услуги.
Во наредните месеци Комисијата ќе треба да го усогласи нацрт-текстот со земјите од ЕУ и со Европскиот парламент пред тој да стане закон.
(Euronews)
(фото: Pexels)
