Туризмот на Куба претрпе остар пад откако Соединетите Држави го засилија притисокот врз островот оваа година, упатувајќи закани кон меѓународните туристички оператори и воведувајќи енергетско ембарго. Според официјалните податоци, бројот на туристи во периодот од јануари до јули оваа година опаднал за 62 отсто во споредба со истиот период претходната година, што претставува тежок удар за клучен сектор на кубанската економија.
Извештајот на Националната канцеларија за статистика и информации (ONEI), објавен во вторникот, покажува дека 419.000 туристи ја посетиле Куба од почетокот на годината, наспроти 1,1 милион во истиот период лани.
Податоците го потврдуваат она што е веќе видливо на улиците на кубанските градови: хотелите, хостелите и приватните сместувачки капацитети се затвораат, додека на плажите, во продавниците и на туристичките атракции се забележуваат малку странски посетители.
Во јануари американскиот претседател Доналд Трамп воведе сеопфатно енергетско ембарго кон Куба, вршејќи притисок врз земјата да го промени својот политички и економски модел. Ова дополнително ја влоши постоечката криза предизвикана од други американски санкции и неуспешната домашна финансиска реформа што поттикна инфлација.
Во периодот од мај до јули Стејт департментот на САД објави санкции насочени кон самото јадро на кубанската туристичка индустрија, вклучително и замрзнување на сметки и забрана за деловно работење во рамките на американскиот финансиски систем. Хотелските синџири како Meliá и Iberostar, кои работат на Куба уште од 90-тите години, како и Royalton, потоа ги суспендираа сите договори во оваа карипска земја. Беа укинати и опциите за плаќање преку системите Visa и Mastercard.
Големите авиокомпании, вклучувајќи ги World2Fly, Air France, Turkish Airlines и Iberia, претходно ги суспендираа летовите откако владата објави дека авионите повеќе не можат да полнат гориво на Куба.
Во 2019 година Куба пречека околу 4,3 милиони туристи, а туристичката индустрија стана еден од клучните економски двигатели на земјата во текот на изминатите три децении. Кубанските власти претходно изјавија дека туризмот генерирал годишен приход од околу три милијарди долари.
(021)
(фото: Wikimedia)
