Ако веќе размислувате каде да патувате следната година, Lonely Planet штотуку понуди 50 причини да почнете со планирање. Нивната листа „Best in Travel 2027“ (Најдоброто од патувањата за 2027) вклучува дестинации и искуства од целиот свет – од европски градови и тропски острови до сафари-авантури, кулинарски патеки и патувања што бараат малку повеќе храброст.
Овогодишниот избор оди подалеку од едноставното прашање „Каде да се оди?“. Lonely Planet ја подели листата на места што вреди да се посетат и искуства што вреди да се доживеат, водејќи се од идејата дека патувањето не мора нужно да биде конвенционален одмор. Понекогаш тоа е викенд во град, понекогаш патување низ историјата, а понекогаш нурнување во ледените води на Антарктикот.
„Не постои само еден тип на патување што им го препорачуваме на луѓето. Станува збор за пронаоѓање искуство што одговара на она што некој го посакува од патувањето во тој момент“, вели Нитја Чемберс, извршен уредник во Lonely Planet.
Меѓу дестинациите на листата особено се издвојуваат крајбрежните секвои во Калифорнија – со дрвја што можат да достигнат висина од над 100 метри. Чемберс ги опишува како искуство што го потсетува човекот колку е мал во однос на природата – но на најдобар можен начин.
На европската листа вниманието го привлекуваат регионот Венето во Италија и историските градови Верона и Падова, како и Десау во Германија – град поврзан со движењето Баухаус. Исто така, претставени се Шведската ривиера, Шибеник во Хрватска и Леон во Шпанија. За оние што сакаат да ги претворат своите патувања во приказна, Lonely Planet ги препорачува „Патот на Наполеон“ (Route Napoléon) во Франција, пловењето околу Еолските Острови на Сицилија, пешачењето по патеката Сент Катберт (St Cuthbert’s Way) до Линдисфарн во Обединетото Кралство и нуркањето во грчките води.
Еден од најинтересните трендови во овогодишниот избор е акцентот на искуства што активно го вклучуваат патникот во самата дестинација.
На пример, во американската сојузна држава Роуд Ајленд можно е да станете привремен чувар на светилникот на островот Роуз (Rose Island Lighthouse). Гостите можат да поминат една ноќ или цела недела на островот, извршувајќи обврски што вклучуваат одржување на светилникот и секојдневни домашни работи.
На листата се најде и облачната шума Монтеверде во Костарика – место каде што посетителите се чувствуваат како да се буквално над светот – додека искуствата во Африка вклучуваат сафари и набљудување шимпанза во Националниот парк Гомбе во Танзанија, местото каде што Џејн Гудал го започнала своето истражување во 1960 година.
Исто така, претставени се националните паркови Цаво Исток и Цаво Запад во Кенија, лагуните на Нова Каледонија, традиционалната култура на Самоа и природните пејзажи на Сао Томе и Принсипе.
Гастрономијата е уште една клучна тема на листата за 2027 година.
Lonely Planet го издвојува Ченгду во Кина – град познат по џиновските панди, но и како значајна кулинарска дестинација. Во Тајван се препорачува Патеката за гурмани, додека мексиканската долина Гвадалупе се истакнува со своето вино и исклучителната кујна.
На листата се вклучени и Мериленд (САД), каде што искуството се фокусира на уживање во ракови, како и Буенос Аирес и неговата танго-култура. Со други зборови, патувањето сè повеќе се дефинира не само преку знаменитости за фотографирање, туку и преку работи што можат да се вкусат, научат или доживеат.
Азија: Окинава, Ченгду и Гуџарат
Меѓу истакнатите азиски дестинации се Окинава (Јапонија), Ченгду (Кина), Гуџарат (Индија), Да Нанг (Виетнам) и Фулиду (Малдиви).
Значајните искуства вклучуваат патување со традиционален брод до територијата на орангутаните во Малезија, возење со хималајската железница Дарџилинг во Индија, пешачење по крајбрежната патека Мичиноку во Јапонија и истражување на кулинарската сцена во Тајван.
Астана во Казахстан исто така добива посебно признание благодарение на футуристичката архитектура на главниот град.
Од Карибите до Антарктикот
На листата се наоѓаат и дестинации со совршена убавина: Монтсерат, Барилоче и аргентинските езера, Гранада (Никарагва) и Бокас дел Торо (Панама).
Меѓу главните искуства се вбројуваат експедициското крстарење на Галапагос, тангото во Буенос Аирес и истражувањето на прашумата Монтеверде во Костарика.
И на крајот – Антарктикот.
Lonely Planet го опишува „поларното нурнување“ – капењето во ледените води на Антарктикот – како врвно искуство што задолжително треба да се доживее во животот. Концептот е едноставен: враќање дома со чувство дека сте постигнале нешто што некогаш не сте можеле ни да го замислите.
Што е на списокот за 2027 година?
Северна Америка
Дестинации: Квебек, крајбрежните секвои во Калифорнија, Мериленд, островот Принц Едвард и Њу Мексико.
Искуства: престој во светилникот “Роуз Ајленд” (Rose Island Lighthouse) во Роуд Ајленд, панорамски лет над Алјаска, вино и гастрономија во Ваље де Гвадалупе, обиколка на хотелите во Саут Бич во Мајами и патување по споредни патишта низ Минесота.
Европа
Дестинации: Венето, Десау, Шведската ривиера, Шибеник и Леон.
Искуства: Патот на Наполеон (Route Napoléon), едрење околу Еолските Острови, патеката „Сент Катбертс Веј“ (St Cuthbert’s Way) до Линдисфарн, нуркање.…во Грција и истражување на фјордот Килари во Ирска.
Кариби, Централна и Јужна Америка
Дестинации: Монтсерат, Барилоче и езерата во Аргентина, Гранада во Никарагва и Бокас дел Торо во Панама.
Искуства: експедиција на Галапагос, танго во Буенос Аирес, капење во ледените води на Антарктикот и посета на Монтеверде во Костарика.
Африка и Блискиот Исток
Дестинации: Оман, Рабат и националните паркови Цаво Исток и Цаво Запад во Кенија.
Искуства: музеи во Абу Даби, сафари во Гомбе и истражување на Сао Томе и Принсипе.
Океанија
Дестинации: Данедин и Ваитаки во Нов Зеланд, Твид во Австралија и Нова Каледонија.
Искуства: уметност во австралискиот „Црвен центар“ (Red Centre), Faʻa Sāmoa (традиционалниот самоански начин на живот) во Самоа и океански авантури во Француска Полинезија.
Азија
Дестинации: Окинава, Ченгду, Гуџарат, Да Нанг и Фулиду.
Искуства: патување со брод до територијата на орангутаните во Малезија, железницата Дарџилинг Хималаја, крајбрежната патека Мичиноку во Јапонија, кулинарска тура низ Тајван и архитектурата на Астана.
За Чемберс, суштината на едно вакво патување е во нешто повеќе од само разгледување знаменитости. Целта, како што вели таа, е да се вратиме дома „малку изменети“ – со искуство што нè поттикнало да пробаме нешто што можеби претходно не би го направиле.
(Bizlife)
(фото: Chat GPT)
