Во текот на овој век човечката популација ќе го достигне својот врв, а потоа ќе почне да опаѓа. Во најновиот извештај на Одделот за население на Обединети нации се наведува дека моментално на Земјата живеат 8.123.518.311 луѓе, најмногу што некогаш имало на нашата планета.
Според проценките и проекциите на ОН, врз основа на податоците за раѓањата и смртните случаи ширум светот, се чини дека глобалната стапка на наталитет ќе продолжи да се зголемува во следните 50 години, така што до средината на 2080-тите би можело да има околу 10,3 милијарди луѓе, по кој бројот на жители треба да почне да опаѓа, па до 2100 година да имаме околу 10,2 милијарди жители.
Секој четврти човек на глобално ниво живее во земја чие население веќе го достигнала својот врв. Во 63 земји и територии, каде што во 2024 година живееле 28% од светското население, големината на населението го достигнала врвот пред 2024 година. Во 48 земји и територии, кои сочинуваат 10% од светското население во 2024 година, се предвидува дека големината на населението ќе достигне врв меѓу 2025 и 2054 година.
Во останатите 126 земји и територии населението веројатно ќе продолжи да расте до 2054 година, потенцијално достигнувајќи го својот врв подоцна овој век или по 2100 година.
Жените денес раѓаат едно дете помалку во просек од околу 1990 година. Во моментов, глобалната стапка на фертилитет е 2,3 живородени по жена, што е помалку од 3,3 раѓања во 1990 година. Повеќе од половина од сите земји и територии на глобално ниво имаат стапка на фертилитет под 2,1 раѓање по жена, што е потребно ниво за населението да одржува постојана големина на долг рок без миграција.
(Vidi.hr)
(фото: Needpix)
