Американскиот претседател Доналд Трамп воведе сеопфатни царини од 25 отсто за Мексико и Канада, потег кој има за цел да ги принуди главните американски трговски партнери на отстапки. Сепак, овој потег се заканува да ја ослабне северноамериканската економија, вклучително и онаа на САД, во време на значителна економска тензија.
Трамп, исто така, ја удвои царината за целиот увоз од Кина, зголемувајќи ја од 10 на 20 проценти. Овие тарифи се надоврзуваат на веќе постоечките царини за кинески стоки во вредност од стотици милијарди долари.
Иако претседателот Трамп и на Канада и на Мексико им даде голема можност да ги ограничат опасните активности на картелите и протокот на смртоносна дрога во нашата земја, тие не успеаја адекватно да ја решат оваа ситуација, се вели во соопштението на Белата куќа објавено непосредно пред стапувањето на сила на тарифите.
Овие мерки доаѓаат во време кога инфлацијата се уште е сериозен проблем. Американците, како и американската економија во целина, се на несигурна почва, што го потврдуваат неодамнешните економски податоци. Царините се закануваат да ги зголемат цените на широк спектар на производи што Американците ги увезуваат од овие три земји.
Според податоците на Министерството за трговија, Мексико, Канада и Кина минатата година во САД испорачале стока во вредност од 1,4 трилиони долари, што е повеќе од 40 отсто од вкупната вредност на целата стока увезена во САД.
Фото – Pxhere
