Луѓето се воодушевени кога гледаат возила како посипуваат сол на патиштата во холандскиот град Хилверсум среде лето, но за тоа постои практична причина. Поради високите температури, кои можат да го загреат асфалтот до над 50 степени Целзиусови, градските власти користат влажен раствор од сол за да ја оладат површината на патот и да спречат нејзино оштетување.
На екстремна топлина асфалтот омекнува, особено на деловите изложени на сонце, раскрсниците и кружните текови. Кога тешките возила возат по таква површина, се формираат вдлабнатини и камењата во асфалтот почнуваат да се одделуваат.
„Ја користиме солта за ладење на патиштата“, објасни општинскиот портпарол, Јероен Остерхерт. Според него, сувата сол не се посипува како во зима, туку влажен раствор од сол. Влажноста од неа испарува, го лади асфалтот и го намалува ризикот од деформација и пукање на површината на патот.
Остерхерт вели дека оваа мерка е особено важна за време на топлотни бранови, како оној што ја погоди Европа во јуни. На некои места температурите на асфалтот надминаа 50 степени.
Иако многумина се изненадени од глетката на камиони за сол во средината на летото, оваа практика не е нова и веќе се користела во други холандски градови. Сепак, поради можното влијание на хлоридите врз животната средина, некои општини ја напуштаат.
Слични мерки се спроведуваат и во други земји. Во Велика Британија, за време на екстремна топлина патиштата се посипуваат со песок или камена прашина за да се спречи лепење на омекнатиот битумен за гумите, додека некои заедници користат вода за ладење на коловозот.
Според Остерхерт, водата има краткорочен ефект, додека растворот на сол го лади асфалтот многу подолго.
(NH Nieuws/021)
(фото: PickPik)
