Научници од Универзитетот Нортвестерн развија револуционерен уред за носење кој им овозможува на корисниците да чувствуваат цела палета на реални тактилни сензации преку нивната кожа – вклучувајќи притисок, вибрации, истегнување, лизгање и извртување. За разлика од постоечките хаптички технологии, кои се ограничени на едноставни вибрации, овој уред може да примени сили во сите правци и да ги комбинира на софистициран начин, создавајќи автентично чувство на допир.
Како што пренесува порталот WebMind, тоа е уред кој е лесен, компактен, безжичен и се напојува со мала батерија на полнење. Се поврзува преку Bluetooth со паметни телефони и опрема за VR, а може да се носи на различни делови од телото, сам или во комбинација со повеќе уреди. Содржи и акцелерометар, кој овозможува препознавање на движењата и положбата, што дополнително го подобрува хаптичкиот повратен одговор во реално време.
Оваа технологија има голем потенцијал – од подобрување на виртуелната и проширената реалност, преку помошни технологии за луѓе со сензорни оштетувања, до апликации во медицината, онлајн купување или пренесување на чувството на музика преку кожа. Тоа е голем чекор кон спојување на дигиталниот и физичкиот свет, со додавање на она што досега ни недостасуваше во виртуелниот простор – вистинско чувство за допир.
(Web Mind)
(фото: Flickr)
