Кина воведува привремени царини до 42,7 проценти за млечни производи, вклучувајќи млеко и сирење, увезени од Европската Унија, објави кинеското Министерство за трговија. Зголемените царини, кои стапуваат на сила во вторник, се базираат на прелиминарните резултати од истрагата што ја започна Министерството за трговија на Кина во август 2024 година. Истрагата опфаќаше субвенции што земјите од ЕУ ги обезбедија за нивните млечни производи и други земјоделски производи.
Истрагата на Пекинг е дел од мерката за реципроцитет, откако ЕУ ги истражи кинеските субвенции за електрични автомобили, а подоцна воведе царини до 45,3 проценти за електрични возила од Кина, пишува Бета. Кина, исто така, започна истраги за увозот на европска ракија и свинско месо како контрамерка на царините на ЕУ за кинеските електрични автомобили, а во исто време ја повика ЕУ да ги укине тие царини. Привремените царини за увоз на млечни производи од ЕУ ќе се движат од 21,9 до 42,7 проценти и ќе опфаќаат различни производи, вклучувајќи свежи и преработени сирења, сино сирење, млеко и 10 проценти масленост на кремот.
Министерството изјави дека прелиминарните резултати од истрагата покажуваат дека субвенциите што ги обезбедуваат ЕУ и земјите-членки за млечни производи ѝ наштетиле на кинеската млечна индустрија. Истрагата за млечните производи на ЕУ опфаќа субвенции доделени во рамките на Заедничката земјоделска политика на ЕУ, како и субвенции дадени на земјоделците од земјите од ЕУ, вклучувајќи ги Италија, Ирска и Финска, соопшти Министерството за трговија во август 2024 година.
Односите меѓу Кина и ЕУ се затегнати, а трговскиот суфицит на Кина со ЕУ неодамна излезе во јавноста. ЕУ бележи значителен трговски дефицит со Кина, кој минатата година надмина 300 милијарди евра. Минатата недела, Пекинг објави дека воведува тарифи до 19,8 проценти за увоз на свинско месо од ЕУ, што е значително пониско од прелиминарните тарифи до 62,4 проценти.
Кина ја обвини ЕУ дека прави дампинг на свинско месо и производи од свинско месо, продавајќи ги по ниски цени, што, според кинеската страна, ѝ наштетило на нивната месна индустрија. Во јули, Пекинг, исто така, објави дека воведува царини до 34,9 проценти за алкохолни пијалоци увезени од ЕУ, вклучително и коњак од Франција, иако некои големи брендови беа ослободени од овие царини.
Фото – Pxhere
