Македонија2025, во соработка со Кабинетот на Претседателот на Македонија, ги повикува граѓаните, институциите, организациите и сите релевантни чинители во земјата и странство активно да се вклучат во процесот на номинирање кандидати за Признанието за придонес на припадниците на дијаспората за 2026 година.
Со овој повик упатуваме јавен апел да се препознаат и предложат оние поединци/организации од дијаспората кои со својата работа, знаење, интегритет и посветеност оставиле видлив и траен белег врз развојот на Македонија. Признанието е наменето за физички лица со потекло од Република Македонија – без оглед дали поседуваат македонско државјанство – кои преку лична иницијатива или преку организации и мрежи придонеле за економски, општествен, образовен, научен, културен или хуманитарен напредок на земјата, или ја афирмирале Македонија на меѓународната сцена.
Ова признание претставува симболично, но суштински важно признание за несебичниот придонес даден без лична корист – преку донации, инвестиции, отворање можности за соработка, трансфер на знаење, волонтерска работа, застапување на македонските интереси или промоција на македонската култура и вредности во светот.
Ги охрабруваме сите што знаат за вакви примери на посветеност и општествена одговорност да ги предложат овие личности. Номинации можат да поднесат домашни и странски физички лица, здруженија на граѓани, владини и невладини организации, асоцијации, како и функционери и вработени во државни органи.
Признанијата се доделуваат во различни области, согласно конкретниот придонес на номинираното лице, меѓу кои: филантропија и социјално влијание, бизнис и претприемништво, академска и истражувачка извонредност, лидерство и застапување, уметност и култура, хуманитарна работа, иновации и технологија.
Признанијата ги врачува Претседателот на Македонија, во форма на повелба и плакета, на свечен настан во рамки на Самитот на Македонија2025 или друг пригоден настан.
Селекцијата се спроведува од страна на независна Комисија составена од истакнати поединци и претставници на релевантни институции од земјата и странство.
Иницијативата e воспоставена во 2023 година со цел институционално и јавно да се оддаде признание на членовите на дијаспората кои придонесуваат за својата татковина. Таа создава простор за изразување благодарност кон оние што, иако живеат и работат надвор од земјата, остануваат активен и значаен дел од нејзиниот напредок. До денес се врачени четири признанија, со што се поставија темели на традиција која го афирмира позитивниот пример и ја јакне врската помеѓу дијаспората и Македонија. Повеќе за претходните добитници: https://macedonia2025.com/award/recognition-for-diaspora-contribution/
Повеќе информации за ПОВИКОТ.
Крајниот рок за доставување на номинации е 20 март 2026 година (23:59 часот), по електронски пат на адресата: diasporarecognition@macedonia2025.com.
Ги повикуваме сите релевантни субјекти да ја искористат оваа можност и да предложат кандидати/организации чии дела заслужуваат јавно признание.
Да ги препознаеме и вреднуваме оние што несебично придонесуваат за иднината на Македонија.
