Ормутскиот теснец е отворен за бродови од „повеќето“ земји, изјави иранскиот министер за надворешни работи, Абас Аракчи, за Ал Џезира, а неговата иднина ќе биде одлучена, рече тој, од страна на Иран и Оман, кои делат територијални води во преминот.
Иран ја презеде контролата врз Ормутскиот теснец како одговор на нападите на САД и Израел, забранувајќи им на бродовите поврзани со САД, Израел и нивните сојузници транзит.
Иранските власти постојано нагласуваат дека теснецот не е затворен, велејќи дека бродовите од „пријателски“ земји можат да поминат низ него, во координација со иранската морнарица.
Од перспектива на Иран, нагласи Аракчи во интервју за Ал Џезира објавено во среда, теснецот е отворен за бродови од повеќето земји.
„Теснецот е затворен само за бродови на оние кои се во војна со нас. Ова е нормално за време на војна – не можеме да им дозволиме на нашите непријатели да ги користат нашите територијални води за трговија“, објасни иранскиот министер за надворешни работи.
Бродовите поврзани со други земји одлучија да не пловат низ теснецот поради безбедносни причини, високи трошоци за осигурување или други причини, рече Аракчи.
Некои земји преговараат со иранската влада за да им дозволат на нивните бродови да поминат, додаде министерот, истакнувајќи дека неколку индиски, пакистански, турски и кинески бродови поминале низ теснецот.
Минатата недела Аракчи рече дека на „пријателските“ земји им е дозволено да поминат, именувајќи ги Кина, Русија, Индија, Ирак и Пакистан.
Иднината на теснецот, изјави тој, ќе ја одредат Иран и Оман.
Водите на Ормутскиот теснец се под територијална контрола на Иран и Оман, кои ќе одлучат за својата иднина по војната, објасни Аракчи, според извештајот на Ал Џезира.
Тесневот ги поврзува Оманскиот Залив и Персискиот Залив. Северната страна на теснецот му припаѓа на Иран, додека на јужната страна врвот на полуостровот Мусандам му припаѓа на Султанатот Оман, а остатокот на Обединетите Арапски Емирати.
Теснецот мора да биде „мирен воден пат“, заклучи Аракчи во интервју за Ал Џезира.
Земјите од Персискиот Залив, вклучувајќи го и Катар, инсистираат на учество во сите разговори за иднината на теснецот.
Пакистан и Кина во меѓувреме објавија план за завршување на војната во Иран, истакнувајќи меѓу нивните пет точки безбедноста на бродските патишта низ Ормутскиот теснец.
Пекинг и Исламабад ги повикаа сите страни да ја заштитат безбедноста на бродовите и членовите на екипажот заглавени во Ормускиот теснец и да им дозволат на цивилните и комерцијалните бродови безбедно да поминат што е можно поскоро.
Сообраќајот низ Ормутскиот теснец треба да се нормализира што е можно поскоро, според кинеската новинска агенција Ксинхуа, точка од планот меѓу Кина и Пакистан.
Во меѓувреме, иранскиот парламент усвои нацрт-закон кој предвидува безбедносни аранжмани при навигација низ теснецот и „финансиски рамки“, вклучително и систем за наплата на такси, во ирански ријали, објави во среда претседателот на парламентарниот комитет за безбедност, Моџтаба Зареи.
Според тој предлог, транзитот ќе биде забранет за бродови поврзани со САД и Израел. Бродовите од земјите кои еднострано воведоа санкции врз Иран можат да сметаат на ограничувања, рече Зареи.
Иранскиот функционер, исто така, нагласи дека Техеран се координира со Оман во развојот на правна рамка за управување со теснецот, додека иранската војска треба да игра централна улога во новиот систем.
(Forbes.hr)
