Додека светот сè уште зборува за мисијата Artemis II, која однесе четири астронаути на другата страна на Месечината, Националната администрација за аеронаутика и вселена на САД (НАСА) веќе се подготвува за следниот чекор.
НАСА ги откри плановите за Artemis III, мисија која ќе ги држи астронаутите блиску до Земјата, но ќе тестира системи потребни за идните слетувања на Месечината.
“Мисијата, исто така, ќе тестира операции со повеќе вселенски летала и ќе соработува со партнери пред астронаутите да бидат испратени на Месечината, рече Џереми Парсонс“, вршител на должноста помошник заменик-администратор за програмата Месечина до Марс.
Мисијата Artemis III вклучува лансирање на вселенското летало Orion со екипаж од четири лица. Вселенското летало ќе остане во ниската Земјина орбита за да овозможи повеќе можности за лансирање за секој сегмент од мисијата, вклучувајќи ја и ракетата SLS, која ќе го испрати Orion и неговиот екипаж во вселената.
НАСА вели дека, исто така, ќе им даде време на SpaceX и Blue Origin да ги тестираат своите ракетни системи за слетување луѓе на Месечината.
Владините договори на програмата Artemis првично беа доделени на Space X за нејзината ракета Starship, но НАСА соопшти дека повторно ќе го отвори натпреварот поради одложувања. Во меѓувреме, Blue Origin на Џеф Безос го тестира својот лендер Blue Moon на претстојната роботска мисија подоцна оваа година.
Екипажот, кој сè уште не е официјално именуван, ќе помине повеќе време во вселената отколку на претходните мисии за да ги тестира системите за поддршка на животот на вселенското летало, вклучувајќи ги и резервите на вода, кислород и азот.
Астронаутите, исто така, за прв пат ќе го демонстрираат во орбитата системот за приклучување на вселенското летало, процесот преку кој две вселенски летала се поврзани за полнење гориво.
Ова е клучен дел од идните мисии на Месечината, а подоцна и на Марс, бидејќи подолгите патувања ќе бараат полнење гориво што ќе мора да се направи во вселената.
„Оваа мисија ќе обезбеди важни информации за концептите на приклучување на лендерот, престојот на екипажот и мисиските операции, како подготовка за идните површински мисии“, се вели во соопштението на НАСА.
Агенцијата додаде дека сè уште има прашања што треба да се одговорат во врска со мисијата Artemis III, вклучувајќи го времетраењето на мисијата, нејзините научни цели и како астронаутите ќе комуницираат со контролата на летот на Земјата.
Овој опис на мисијата претставува промена од оригиналниот план на програмата Artemis на НАСА, според кој Artemis III требаше да ги врати луѓето на Месечината.
Долгоочекуваното враќање на луѓето на површината на Месечината сега ќе мора да почека за мисијата Artemis IV, која е планирана за 2028 година.
(Euronews)
