Францускиот парламент усвои закон со кој се дозволува евтаназија за терминално болни возрасни, после години дебата на оваа тема.
Долниот дом на парламентот гласаше со 291 гласови „за“ и 241 „против“ во корист на законот. Усвоениот предлог нема веднаш да стане закон, бидејќи противниците велат дека ќе бараат преглед дали е во согласност со францускиот Устав.
Долниот дом ја поддржа мерката во три претходни читања, со што се заврши работата на парламентот за законот што францускиот претседател Емануел Макрон го објави пред повеќе од три години.
„Се обврзав да го отворам овој пат со францускиот народ во 2022 година. Со сериозност, со понизност и со целосно почитување на нашата демократија, оваа обврска е исполнета“, напиша Макрон на IX.
Според различни проценки, околу 300 милиони луѓе ширум светот имаат пристап до асистирано умирање. Евтаназијата е легална во некои земји под одредени услови, а асистираното самоубиство е легално во други и во неколку американски држави.
Француското население старее, а бројот на пациенти во земјата на кои им е потребна грижа за хронични болести се зголемува. Франција, традиционално католичка земја, долго време дебатира за правните, медицинските, моралните и религиозните аспекти на опциите за крај на животот.
Сегашното законодавство им дозволува на лекарите да ги држат терминално болните пациенти под седација пред смртта, но не дозволува асистирано самоубиство или евтаназија.
Многу Французи патувале во соседните земји каде што медицински асистираното самоубиство или евтаназијата се легални. Медицински асистираното самоубиство вклучува пациентот доброволно да зема смртоносни лекови препишани од лекар. Евтаназијата вклучува лекар или друг здравствен работник кој дава смртоносна инјекција на барање на пациентот.
Опциите за крај на животот се дебатираат и во Обединетото Кралство на Велика Британија и Северна Ирска. Предлог-закон за легализација на асистирано умирање во Англија и Велс ќе биде вратен во парламентот на 11 септември.
Предложената мерка во Франција првенствено би обезбедила медицински асистирано самоубиство, дозволувајќи им на пациентите да примаат и да администрираат смртоносни лекови под строги услови. Добивањето таква помош од лекар или медицинска сестра би било дозволено само за луѓе кои не се во можност сами да го сторат тоа поради сериозна физичка состојба.
Пациентите кои сакаат да си го одземат животот ќе мора да имаат најмалку 18 години и да бидат француски државјани или жители на Франција.
Лекарот прво ќе мора да се консултира со тим од здравствени професионалци, а потоа да потврди дека пациентот има сериозна и неизлечива болест која го загрозува животот. Пациентот мора да биде во напредна или терминална фаза, да страда од неподнослива или неконтролирана болка и доброволно да го побара смртоносниот лек.
Пратениците разјаснија дека самото психолошко страдање не е доволно за да му се дозволи на лицето да се подложи на медицински потпомогнато умирање. Мерката, исто така, нема да биде достапна за лица со тешки психијатриски нарушувања или невродегенеративни болести како што е Алцхајмеровата болест.
(021)
(фото: Easy Peasy AI)
