Претседателот на Соединетите Американски Држави, Доналд Трамп, изјави дека вештачката интелигенција (ВИ) во иднина треба да се нарекува „суперинтелигенција“, бидејќи тој термин звучи „многу подобро“ и е попрецизен. Тoj пред Генералното собрание на Обединетите нации изјави дека сите документи на САД ќе бидат променети за да го користат терминот „суперинтелигенција“, изразувајќи надеж дека и другите земји ќе го сторат истото.
Вештачката интелигенција, според него, звучи како интелигенцијата да е „лажна“ и е, како што изјави, „невероjaтна“. Зборувајќи за ризиците од новата технологија, Трамп рече дека секоја голема нова технологија носи предизвици и дека „суперинтелигенцијата не е исклучок“.
Тој ги спореди критичарите на вештачката интелигенција со луѓе кои предупредуваа на последиците од глобалното затоплување и климатските промени, тврдејќи дека терминот „глобално затоплување“ подоцна бил променет во „климатски промени“ бидејќи, рече тој, планетата се лади, а не се затоплува.
Трамп рече дека тоа се истите луѓе кои сега тврдат дека вештачката интелигенција ќе „убие сè“, дека роботите ќе напаѓаат луѓе и дека сè ќе заврши со „тотална катастрофа“.
Зборувајќи за регулирањето на вештачката интелигенција, Трамп рече дека САД „апсолутно го отфрлаат секој обид за создавање глобалистичка шема за контрола“ на технологијата. „Кој и да ја добие трката за суперинтелигенција, победува“, рече Трамп.
Фото – Wikimedia
