Minecraft повеќе нема да биде само игра што гејмерите ја играат дома. Од 2027 година тие ќе можат и да престојуваат во свет инспириран од една од најпопуларните видеоигри на сите времиња. Новиот хотел Minecraft World ќе се отвори во рамките на комплексот Chessington World of Adventures, недалеку од Лондон, и ќе располага со 69 тематски соби. Хотелот ќе биде дел од новата зона Minecraft World, која ќе вклучува и тематски атракции, ресторани и продавници.
Овој проект доаѓа во време кога гејмингот сè повеќе излегува надвор од рамките на конзолите и компјутерите и станува дел од туристичката и угостителската индустрија. Патувањата инспирирани од видеоигри повеќе не се ограничени само на посети на тематски паркови или гејминг-конвенции; некои хотели сега им нудат на гостите можност буквално да зачекорат во светот на нивната омилена игра.
Во Јапонија, на пример, синџирот MIMARU веќе нуди соби со тема Pokémon во 10 хотели низ Токио, Кјото и Осака. Ентериерите се дизајнирани во препознатливиот стил на франшизата, вклучувајќи сè – од ликови и декорации до тематски кујни и бањи.
Трендот отиде и чекор понатаму: во септември во јапонската префектура Хокаидо беше отворен хотел во форма на Poké Ball (Поке-топка), како дел од соработката со играта Pokémon Sleep. Оваа капсула широка три метри се наоѓа покрај езеро и е дизајнирана да им го понуди на гостите искуството на спиење во огромна Poké Ball.
Сличен концепт постои и во Шпанија. Хотелот Magic Games, дел од комплексот Magic World Resort во Оропеса дел Мар, им нуди на гостите соби инспирирани од игри, конзоли, искуства со виртуелна (VR) и проширена реалност (AR), турнири и музеј на видеоигри. Сега и Обединетото Кралство се приклучува кон овој тренд.
Хотелот Minecraft ќе располага со 20 премиум соби и 49 стандардни соби, иако точниот датум на отворање во 2027 година сè уште не е објавен. Целиот хотел е дизајниран така што гостите да се чувствуваат како да зачекориле директно во светот на Minecraft. Во лобито ќе бидат поставени дрвја и животни карактеристични за играта, лифтовите ќе бидат инспирирани од порталите кон Nether, а ходниците ќе потсетуваат на рударски окна.
Собите ќе содржат блокови, предмети, суштества, текстури и бои карактеристични за Minecraft, приспособени за амбиентот на реалниот свет.
Гостите ќе имаат пристап и до тематски ресторан и бар за „напивки“ (potion bar), како и до разни интерактивни содржини. Поширокиот простор на Minecraft World ќе опфаќа продавници, дополнителни ресторани и атракции за семејства.
Посебна атракција ќе биде Escape the Nether – првиот тобоган (ролеркостер) во светот со тема Minecraft, кој ќе вклучува делови и во затворен и на отворен простор.
„Размислувавме за секој детал, од големината на блоковите до начинот на кој ќе ги пренесеме суштествата и биомите во реалниот свет“, изјави Филип Китли-Том, креативен директор за паркови и доживувања поврзани со Minecraft во студиото Mojang, компанијата што стои зад овој проект.
Тој истакна дека целта е да се создаде автентично Minecraft искуство и да им се овозможи на посетителите да ја доживеат играта на сосема поинаков начин. Ваквите проекти покажуваат како границата меѓу забавата, туризмот и гејмингот сè повеќе се брише. Наместо фановите само да гледаат содржини или да играат игри, компаниите се обидуваат да ги трансформираат нивните омилени виртуелни светови во физички локации што тие можат да ги посетат, истражат и каде што можат да поминат неколку дена.
(Bizlife)
(фото: Pexels/Alexander Kovalev)
