Германската фармацевтска и агрохемиска компанија Баер објави дека ќе инвестира 2,2 милијарди долари (1,96 милијарди евра) во нов производствен погон во Соединетите Американски Држави.
Баер очекува да создаде околу 600 висококвалификувани работни места во деловната зона Њу Албани Интернешнл Бизнис Парк, додека околу 1.500 градежни работници треба да бидат вработени за време на изградбата на објектот.
Новиот комплекс ќе биде дизајниран како флексибилна и модуларна фабрика што ќе комбинира производство на активни фармацевтски состојки и готови лекови и ќе користи напредни дигитални и автоматизирани технологии, објавува Хина.
Фабриката првично ќе произведува лекови за третман на рак и кардиоваскуларни и бубрежни заболувања. Првиот дел, во кој ќе се произведуваат активни супстанции, треба да биде завршен до 2031 година, а вториот дел, наменет за производство на готови лекови, до 2034 година.
„Долго време ги сметаме Соединетите Држави за клучна производствена база и центар на иновации“, рече извршниот директор на Баер, Бил Андерсон.
„На новата локација, ќе собереме врвна производствена експертиза и квалификувани вработени, што дополнително ќе ја подобри нашата способност да им обезбедиме на пациентите во САД и другите земји иновативни и висококвалитетни лекови“, рече директорот.
Во последните пет години, Баер инвестираше повеќе од седум милијарди долари во истражување и развој на лекови и нивно производство во САД.
Новата локација ќе биде дел од глобалната производствена мрежа на Баер и треба да обезбеди побезбедна испорака на лекови на пазарите каде што работи компанијата. Објектот во Охајо ќе го надополни седиштето на фармацевтската дивизија на Баер во САД во Випани, Њу Џерси и постојните локации во Питсбург, Беркли, Кембриџ, Рисрч Триангл Парк и Сан Диего.
Баер планира да развие соработка со американските академски институции околу новата локација, поврзувајќи го истражувањето и развојот на нови технологии со напредни производствени капацитети.
(Financije.hr)
Фото – Sebastian Rittau, CC0, via Wikimedia Commons
