Хуманоидни роботи успешно се искачија по планинска патека долга 3,9 километри на кинеската планина Таи, совладувајќи 3.100 камени скалила, како дел од првото натпреварување во роботско планинарење во светот. Покрај нив, во овој уникатен предизвик учествуваа и четириножни роботи, како и роботски егзоскелети, при што сите тие совладаа висинска разлика од 600 метри.
Патеката вклучуваше стрмни нагорнини, долги скалишта и остри свиоци. Додека присутните набљудуваа, роботите се искачуваа на планината, а некои од нив успешно стигнаа до целта.
Овој настан претвори една од најпознатите планински патеки во Кина во полигон за тестирање на роботиката. Нерамните камени скалила и стрмните нагорнини ја ставија на тест способноста на машините да одржуваат рамнотежа и да се движат по тежок терен. Некои од четириножните роботи, додека се искачуваа по патеката, носеа дури и залихи со храна.
На натпреварувањето учествуваа 90 тимови, кои ги претставија најновите достигнувања во истражувањето и инженерството.
(b92)
(фото: Pexels/Kindel Media)
