13.7 C
Skopje
среда, ноември 20, 2019

ЕУ најави 220 милиони евра за дигитално поврзување на Западен Балкан

Kabtel desktop

Дигиталната агенда за Западен Балкан, која е дел од стратегијата на Европската унија за проширување за регионот, ќе биде официјално стартувана на Дигиталното собрание 2018, што денеска и утре се одржува во Софија во организација на Европската комисија и Бугарското претседателство со Советот на Европската унија.

Пакетот за поврзување за 2018 година согласно Дигиталната агенда за Западен Балкан има на располагање 220 милиони евра ЕУ грантови, од кои 190 милиони евра за проекти за поврзување и 30 милиони евра за техничка поддршка за подготовка на дигитални проекти.

Главни области на Дигиталната агенда за Западен Балкан се намалување на трошоците на роамингот, широкопојасниот интернет, развојот на е-влада, е-набавки, е-здравство и дигитални вештини, градењето капцитети во дигиталната доверба и безбедност паралелно со напорите за подобрување на дигитализацијата на индустриите и донесување, спроведување и јакнење на “acquis“ системот.

ЕУ има цел до 2025 година да создаде Гигабит општество, а тоа подразбира во сите училишта, транспортни центри и поголеми јавни сервиси да имаат пристап до интернет со брзина од 1.000 мегабити во секунда или 1 гигабит конекција. Вториот сегмент од оваа цел е сите домови, рурални или урбани средни на територија на ЕУ, да имаат пристап до мрежи кои нудат брзини од најмалку 100 мега бајти во секунда, со можност да се зголеми до 1 гигабит.

На сесијата посветена на Дигиталната агенда за Западен Балкан, како што е најавено, ќе зборуваат Еврокомесарката за дигитална економија и општество, Марија Габриел; македонскиот министер за информатичко општество и администрација Дамјан Манчевски; албанскиот заменик-министер за инфраструктура и енергетика, Дорина Чинари; министерот за комуникации и транспорт на Босна и Херцеговина, Исмир Јуско: косовскиот министер за иновации и претприемништво, Бесим Бечај; државниот секретар од Министерството за јавна администрација на Црна Гора, Дејан Абазовиќ и државниот секретар од Министерството за трговија, туризам и телекомуникации на Србија, Татјана Матиќ.

Дигиталната агенда ги надополнува акциите за дигитална интеграција договорени од лидерите од регионот во повеќегодишниот акциски план за време на регионалниот форум во Трст во јули 2017 година и ги одразува заклучоците од Дигиталниот самит за Западен Балкан, што се одржа во Скопје годинава.

Овогодишното собрание во Софија е значајно поради заложбите на Европскиот совет за целосна имплементација на стратегијата за Единствен дигитален пазар до 2018 година, како и предлогот за повеќегодишна финансиска рамка за дигитална економија. Програмата предвидува три пленарни сесии, со особен фокус на тоа како Централна и Источна Европа и земјите од регионот на Западен Балкан може најдобро да ја искористат дигитализацијата на нивните економии и општества и пет паралелни работилници, со акцент на клучните дигитални политики како што се социјалните медиуми, кибербезбедноста, дигитални вештини, вештачка интелигенција и интернет на нешта.

Дигиталното собрание е годишен форум што обединува над 1.000 заинтересирани страни и креатори на политики на високо ниво со цел да дебатираат за дигиталната политика на ЕУ и за влијанието на технолошките постигнувања.

Сподели!
  •  
  •  

НАЈПОПУЛАРНИ

Сподели!
  •  
  •