Воведувањето на системот EES (систем за влез/излез) на границите на Европската Унија донесе голем број проблеми во пракса, особено во периоди на зголемен сообраќај, за време на викенд и празнични патувања.
Според директорот на Националното здружение на туристички агенции на Србија (YUTA), Александар Сеничиќ, системот бил лошо дизајниран од самиот почеток и недоволно подготвен за реални услови на терен.
„Системот е доста комплициран и очигледно не е добро испланиран. Веќе во првиот месец и половина се појавија проблеми што можеа да се предвидат. Лицата со попреченост имаат тешкотии при пристапот до самите камери и опремата за земање биометриски податоци. Исто така, постои ситуација со луѓе кои страдаат од артритис и едноставно не можат да обезбедат отпечатоци од прсти. Ова дополнително ги забавува процедурите и создава нервоза, како кај патниците, така и кај граничните службеници кои не знаат како да постапат во овие процедури“, истакнува Сеничиќ.
Ова се само дел од проблемите забележани во текот на првите два месеци од постепеното воведување на системот EES, кој започна со работа на 12 октомври.
Тој потсетува дека целта на системот EES е да се спречи неовластен престој подолг од 90 дена во ЕУ, и дека комплетните биометриски податоци – фотографија од лицето, отпечаток од четири прста од десната рака и пасош – се земаат само при прв влез во системот.
За секој следен влез и излез е потребен само пасош и еден биометриски податок – фотографија или отпечаток од прст, а целата постапка треба да трае десет секунди. Меѓутоа, во пракса тоа често не е случај.
