Главните земји на Организацијата на земјите извознички на нафта (ОПЕК) и ОПЕК+ се согласија да ги зголемат квотите за производство за јуни, но како што објавува Блумберг, станува збор за скромно и симболично зголемување, со намера да се испрати порака за продолжување на вообичаеното работење по ненадејното излегување на Обединетите Арапски Емирати од организацијата.
Седум земји, вклучувајќи ги Саудиска Арабија и Русија, ќе го зголемат дневното производство за околу 188.000 барели почнувајќи од јуни, што беше договорено на видеоконференција на делегатите на земјите-членки, објави ОПЕК.
Организацијата ОПЕК+, чии членови се помали земји извознички и партнери на земјите од ОПЕК, ќе го продолжи процесот на враќање на производството, кој беше запрен неколку години пред почетокот на војната во Иран, се додава во соопштението.
Во соопштението не се споменуваат ОАЕ ниту излегувањето на земјата од ОПЕК. Блумберг објави дека излегувањето на ОАЕ од ОПЕК ги изненадило земјите-членки и земјите-партнери и дополнително ја поткопало способноста на картелот да влијае на цените на нафтата, кои веќе беа во пад поради зголемувањето на бројот на конкурентски добавувачи, вклучувајќи ги и оние од Северна и Јужна Америка.
Агенцијата проценува дека договореното зголемување на производството е симболичен потег бидејќи земјите-членки на Блискиот Исток нема да можат да го спроведат зголемувањето освен ако Ормутскиот теснец не се отвори повторно и извозот од Персискиот Залив не продолжи.
Иако излегувањето нема непосредно влијание врз снабдувањето со нафта, тоа ќе им овозможи на ОАЕ да ја зголемат понудата со темпо што им одговара откако ќе се отвори водниот пат, бидејќи нема да бидат ограничени од квотите на ОПЕК.
ОАЕ ги напуштија ОПЕК и ОПЕК+ на 1 мај. Медиумите оценија дека потегот на ОАЕ претставува тежок удар за членовите на ОПЕК и нивниот де факто лидер, Саудиска Арабија, во време кога војната меѓу Соединетите Американски Држави и Израел против Иран предизвика историски енергетски шок и ја наруши глобалната економија. Земјите-членки на ОПЕК произведуваат повеќе од една третина од светските резерви на нафта.
Организацијата е основана во 1960 година, а нејзини земји-членки се Алжир, Република Конго, Екваторска Гвинеја, Габон, Либија, Нигерија, Ирак, Иран, Кувајт, Саудиска Арабија и Венецуела, а по 2016 година и големиот пад на цените на нафтата, ОПЕК потпиша договори со уште 10 земји производители на нафта: Русија, Азербејџан, Бахреин, Брунеи, Бразил, Казахстан, Малезија, Мексико, Оман, Јужен Судан и Судан, со што се создаде организацијата ОПЕК+.
Целта на организацијата е да обезбеди стабилизација на пазарот и ефикасна, економична и редовна испорака на гориво.
(Blic.rs)
Фото – Pxfuel
