Биометриските проверки за граѓани кои не се членки на ЕУ предизвикаа часови одложувања и пропуштени летови, а аеродромите предупредуваат дека ситуацијата може да се влоши во текот на летната сезона.
Новиот дигитален граничен систем на Европската Унија, познат како EES (Систем за влез/излез), предизвика целосен колапс и часови одложувања на аеродромите низ Европа.
Марко Тронконе, директор на Аеродроми ди Рома, кои управуваат со аеродромите Фјумичино и Чампино во Рим, предупреди дека привременото суспендирање на биометрискиот систем за граѓани кои не се членки на ЕУ е единствениот начин да се избегне летниот хаос.
Новиот систем бара од граѓаните кои не се членки на ЕУ да обезбедат отпечатоци од прсти и фотографија од лицето при прв влез во Унијата. Додека EES требаше да ги забрза граничните проверки, технологијата не успеа, што веќе доведе до долги редици и пропуштени летови.
- “Многу сме загрижени за летото. На скала од еден до десет, мојата загриженост моментално е осум или девет. Овој процес се покажа како апсолутно некомпатибилен со огромниот број патници со кои ќе се соочиме. Единствениот начин е да се „отвори вентилот“. Нема начин да постигнеме 100% регистрација на патници во системот” изјави Тронконе за Financial Times.
Меѓународната асоцијација за воздушен транспорт (IATA) издаде драматично предупредување во кое се наведува дека во шпиц периодите веќе се евидентирани чекања до три и пол часа, додека во текот на летото, редовите на некои аеродроми би можеле да достигнат и до шест часа.
Дополнителен проблем е фактот што патниците кои веќе еднаш поминале низ системот EES и треба побрзо да поминат низ граничната контрола, честопати се принудени повторно да поминат низ истите биометриски проверки поради технички грешки.
Критики кон Европската комисија доаѓаат од сите страни. Стефан Шулте, претседател на Европската асоцијација на аеродроми (ACI Europe), рече дека владите на поединечните земји мора да преземат одговорност и да одлучат за привремено суспендирање на системот.
Европската комисија одговори дека системот има „вградена флексибилност“, што овозможува привремено оневозможување на одредени функции во кризни ситуации. Француската полиција веќе беше принудена привремено да ги прекине овие проверки во пристаништето Довер, додека Грција се откажа од претходното ветување за ослободување на одредени патници од биометриски проверки.
(Kamatica)
