Глобалното богатство порасна за 10,8 проценти во 2025 година, но најголеми добитници беа најбогатите, кои сега контролираат речиси половина од вкупното богатство во светот. Глобалното лично богатство го забележа својот најголем раст во последните осум години. Според најновиот извештај на UBS, речиси еден милион нови милионери се создадени низ целиот свет во 2025 година, додека јазот помеѓу најбогатите и остатокот од населението се прошири.
Според Извештајот за глобалното богатство 2026, објавен од Business Insider, вкупното лично богатство во светот порасна за 10,8 проценти минатата година, што е најголемо годишно зголемување од 2017 година. Сепак, најбогатите сегменти на општеството најмногу имаа корист од овој раст.
Според податоците од извештајот, околу 1,5 проценти од најбогатите возрасни жители на планетата денес поседуваат речиси половина од вкупното светско богатство, додека во многу земји средното богатство стагнира или дури опадна, и покрај растот на просечната вредност на имотот.
Во текот на 2025 година низ целиот свет се создадоа речиси еден милион нови милионери, односно повеќе од 2.600 секој ден. Поголемиот дел од новите милионери доаѓаат од САД, каде што е регистрирана речиси половина од вкупниот број новостекнати милионери. Во САД, просечното богатство по возрасен достигна 696.277 американски долари, додека медијанското богатство беше 68.998 долари, што укажува на сè поизразена концентрација на богатство во рацете на помал број најбогати граѓани.
Авторите на извештајот предупредуваат дека иако бројот на луѓе чиј имот вреди помалку од 10.000 долари значително се намалил во последните 25 години, растот на богатството не е рамномерно распределен.
Според нивните проценки, идниот раст на личното богатство сè повеќе ќе зависи од пристапот до финансиските пазари, инвестициите и капиталот, што би можело дополнително да го прошири јазот помеѓу најбогатите и остатокот од населението.
Во извештајот се заклучува дека достапноста на инвестициски средства и финансиски пазари ќе биде еден од клучните фактори што ќе ја одредат распределбата на богатството во наредните години.
(Byka.rs)
(фото: Chat GPT)
