Кризата во Фолксваген добива сè посериозни размери. Додека германскиот автомобилски гигант разгледува понатамошни намалувања на трошоците, можни затворања на фабрики и дополнителни отпуштања, неговите вработени го обвинуваат менаџментот за „катастрофална комуникација“. Во интерна анкета иницирана од работничкиот совет, комуникацијата на менаџментот предводена од извршниот директор Оливер Блум беше издвоена како најголем проблем, дури и поголем од стравот од губење на работни места и затворање на одредени погони, пишува Euronews.
Менаџментот на најголемиот германски производител на возила ги посетува фабриките оваа недела, а Блуме и другите членови на менаџментот ќе одржат девет состаноци со работниците. Првиот се одржа денес во Волфсбург, но Ројтерс пишува дека претставниците на синдикатот не си заминале задоволни.
Нашата доверба во извршниот одбор на оваа компанија, а особено во нејзиниот главен извршен директор Оливер Блум, е скршена. Сè уште не е непоправливо, но сепак е оштетено – изјави шефот на синдикатот на Фолксваген, Даниела Кавало, пред 10.000 работници собрани на вонредно собрание каде што го изразија своето противење на евентуалното затворање на фабриките.
Менаџментот предупреди дека ситуацијата е повеќе од критична бидејќи компанијата не заработува доволно пари за да биде сигурна дека ќе може да финансира нови технологии, нови производи и наши локации на долг рок. Фолксваген бара начин да намали повеќе трошоци додека групацијата се бори со жестока кинеска конкуренција, послаба побарувачка и американски царини. Компанијата објави пад на оперативните резултати во првата половина од годината за 11,6 проценти на 5,9 милијарди евра, додека оперативната маржа се намали од 4,2 на 3,8 проценти.
Извршниот директор
особено предупредува за ситуацијата во Кина. Пазарот таму падна за повеќе од 20 проценти од почетокот на годината. Во исто време, претежно домашни производители, само оваа година претставија повеќе од 500 нови модели, што дополнително го зголемува притисокот врз цените, кои веќе се намалија за повеќе од 15 проценти во последните две години. Покрај тоа, кинеските производители сè повеќе продираат на европскиот пазар на автомобили.
Претходно беше објавено дека ќе бидат укинати 50.000 работни места кај сите брендови вклучени во групата, вклучувајќи го и самиот Фолксваген, како и вработените во Ауди и Порше. Во меѓувреме, се појавија информации дека може да бидат укинати и дополнителни 50.000 работни места.
Тоа не е фиксна цел – додаде Оливер Блум и објасни дека станува збор за теоретска пресметка што покажува колку е голема разликата помеѓу сегашната структура на трошоци на Фолксваген и онаа на неговите конкуренти. Сепак, самата можност за понатамошни отпуштања ги налути синдикатите, кои го обвинија менаџментот на Фолксваген дека не комуницира отворено со вработените.
Најголемата неизвесност ги опкружува четири германски фабрики: локациите на Фолксваген во Емден и Цвикау, фабриката за комерцијални возила Фолксваген во Хановер и фабриката на Ауди во Некарзулм. Сè уште не е донесена конечна одлука за нивно затворање, но Блум истакна дека менаџментот не верува дека фабриките ќе генерираат доволно приходи во следната деценија за да го направат своето работење профитабилно.
(Јutarnji list)
Фото – Wikipedia
