Строгите правила за производство ќе бидат ублажени за некои од најпознатите француски сирења и кашкавали откако сушата и екстремните топлотни бранови ги исушија пасиштата, загрозувајќи го опстанокот на традиционалните млекарници и земјоделци низ целата земја.
“Конте”, тврдо сурово кравјо сирење произведено во планините Јура, е најпродаваното традиционално сирење во Франција, со повеќе од 62.000 тони произведени минатата година.
Владата објави дека производителите на ова и голем број други сирења ќе добијат привремена промена на строгите правила за пасење откако екстремните горештини ги изгореа пасиштата.
Производителите на сирења “бофор” и “абонданс”, кои се прават од млеко од крави на алпските пасишта, исто така добија олеснување.
Сите три сирења ја носат престижната Заштитена ознака за потекло (AOP), што гарантира автентичност и ги штити традиционалните методи на земјоделство.
Правилата строго дефинираат каде пасат животните и што јадат. Но, сушата што погоди 95 проценти од континентална Франција ги остави пасиштата жолти и голи. Затоа, властите одлучија производителите привремено да ги надополнат своите животни со храна и житарки увезени од други региони.
Националниот институт за потекло и квалитет (INAO) ја нарече сушата историска и објави дека планира да им додели помош на производителите на сирења како што се “реблошон”, “кантал”, “бле д’Оверњ” и “фурм д’Амбер”.
Уберт Генти, млечен фармер од Нормандија, вели дека кравите произведуваат значително помалку млеко поради недостаток на хранливи материи.
Неговата сопруга Анџелик, која рачно прави сирење, го објаснува обемот на кризата.
„Обично во ова време од годината произведуваме помеѓу 600 и 700 сирења дневно, но сега едвај можеме да произведеме 400 до 450. Ќе биде многу тешко да се задоволи побарувачката на клиентите“, рече таа.
Ситуацијата е толку критична што околу 70 проценти од производителите на сирење мораа целосно да го паузираат летното производство, додека производителите на познатиот рокфорт бараат итно олабавување на правилата за пасење овци.
Статистиката од француското Министерство за земјоделство покажува дека растот на тревата на трајните пасишта е за една третина помал од просекот забележан во периодот од 1989 до 2018 година.
(Klix.ba)
(фото: Flickr)
