Вредноста на потврденото минерално богатство во рускиот дел на Арктикот се проценува на над 20 трилиони долари, изјави во четвртокот Алексеј Чекунков, министер за развој на рускиот Далечен Исток и Арктикот, според извештајот на руската новинска агенција ТАСС.
Според проценките на Востокгосплан – руска федерална научна институција фокусирана на економскиот развој на Далечниот Исток – досега на Арктикот се откриени наоѓалишта на минерали во вредност од над 20 трилиони долари, наведе министерот.
Сепак, степенот на геолошки истражувања на Арктикот достигна најмногу 20 проценти, истакна министерот, повикувајќи се на проценки од компаниите кои добиле концесии за истражување на минерали.
„Врз основа на овие податоци, можеме да заклучиме дека вредноста на рускиот дел на Арктикот изнесува најмалку 100 трилиони долари“, рече Чекунков.
Арктикот е богат со наоѓалишта на широк спектар минерали, забележува ТАСС, посочувајќи дека регионот учествува со 100 проценти во руското производство на никел и минерали од групата на ретки земји, како и со 99 проценти во производството на метали од групата на платина.
Русија, исто така, 85 проценти од својот природен гас го произведува на Арктикот, според податоците на ТАСС.
(N1)
(фото: Pexels/ Nadezhda Moryak)
