За жителите на оддалечените и тешко достапни области во Канада посетата на лекар може да претставува голем предизвик поради огромните растојанија, недостатокот на инфраструктура и суровите климатски услови. Со цел да се овозможи пристап до здравствени услуги, компанијата Flying Whales го развива проектот за мобилна болница наречен Flying Care. Користејќи го цепелинот LCA60T овој систем ќе може да стигне дури и до најоддалечените делови на Канада. Болницата ќе биде енергетски самоодржлива и опремена за да обезбеди широк спектар на медицински услуги.
Понатаму, таа ќе располага со современи медицински инструменти, а во неа ќе работат лекари и медицински стручњаци способни да вршат стоматолошки и офталмолошки прегледи, да обезбедуваат педијатриска нега, да спроведуваат напредна дијагностика, да работат на превенција од болести, па дури и да изведуваат одредени хируршки зафати.
„Правото на здравје е основно човеково право, вградено во член 25 од Универзалната декларација за човекови права на Обединетите нации од 1948 година. Сепак, во 2021 година, Светската здравствена организација (СЗО) посочи дека повеќе од половина од светското население нема пристап до здравствената заштита што им е потребна. Проектот Flying Care ќе помогне да се зајакне едно од овие универзални човекови права: правото на најдобра можна здравствена заштита“, се наведува на веб-страницата на Flying Whales.
На веб-страницата исто така се истакнува дека Flying Care ќе помогне во намалувањето на нееднаквостите помеѓу големите урбани центри и регионите со неразвиена здравствена инфраструктура.
„Овој амбициозен проект, насочен кон општото добро, се заснова на соработка помеѓу експерти од областа на инфраструктурата и здравството. Колективното знаење и искуство на сите партнери кои учествуваат играат клучна улога во неговата реализација“, стои на веб-страницата на компанијата.
Цепелинот LCA60T, во кој ќе биде сместена мобилната болница, тежи 60 тони и е долг 200 метри. Болничките единици, кои зафаќаат вкупна површина од 630 квадратни метри, ќе бидат целосно опремени според највисоките стандарди и ќе подлежат на строга контрола на квалитетот.
Цепелинот ќе се движи со помош на хибриден електричен погонски систем. Покрај тоа, тој е дизајниран да функционира при екстремно ниски температури, како и да транспортира и спушта тешки товари. Ова решение е развиено преку заеднички истражувачки проект, започнат во 2021 година.
Покрај Flying Whales, во истражувањето учествуваат уште шест партнери со специјализирана експертиза. Меѓу нив се консултантската фирма Roland Berger, инженерската компанија Ingerop, д-р Ксавие Атре, Siemens Smart Infrastructure (компанија специјализирана за технолошки решенија за болници), Praesens Care (дизајнер и оператор на мобилни лаборатории) и Adopejl, консултантска фирма специјализирана за медицинскиот сектор.
„Мобилната болница е идеално решение за обезбедување висококвалитетни болнички услуги – особено преку употреба на најсовремена технологија – за најоддалечените заедници кои, вообичаено, немаат пристап до здравствена заштита. Ова решение е иновативно, еколошки прифатливо, хуманитарно и економично. Тоа ќе придонесе за остварување на целите на СЗО и Обединетите нации за обезбедување универзална здравствена покриеност за дополнителна милијарда луѓе ширум светот до 2030 година“, изјави д-р Ксавие Атре.
(Forbes.hr)
(фото: Pexels/Peter Zulauf)
