Кои се најдобрите земји за живот во 2026 година? Нов глобален извештај на Nomad Capitalist ги рангира најпосакуваните дестинации врз основа на квалитетот на животот, даноците, безбедноста и други критериуми.
Nomad Capitalist е консултантска компанија која им помага на претприемачите и инвеститорите при преселба во странство, обезбедување престој и државјанство, како и даночно планирање. Таа тукушто го објави изданието за 2026 година на својот Nomad Lifestyle Index.
За разлика од традиционалните рангирања на најдобрите места за живеење, кои често се фокусираат на среќата, достапноста на трошоците или квалитетот на животот, овој индекс нуди поширок поглед на тоа што ја прави една дестинација привлечна за некој што размислува за преселба во странство, објаснува Хатија Гелбахијани, директорка за производи во Nomad Capitalist.
„Повеќето рангирања на најдобрите места за живеење го оценуваат животот на луѓето што веќе престојуваат таму. Нашето рангирање проценува што поединецот, кој се сели од една во друга земја, всушност може да добие; даноците и правните можности за добивање престој сочинуваат 40 отсто од вкупниот резултат, заедно со природната средина, безбедноста и квалитетот на животот. Ова покажува што се губи кога сè ќе се сведе на една единствена оценка. Во секоја од петте категории има различен победник.“ вели таа.
За да го креира ова рангирање компанијата Nomad Capitalist евалуираше 63 дестинации во пет категории со еднаква тежина: природа и клима; даноци; престој и пристапност; безбедност и слобода; како и квалитет на живот и инфраструктура. Секоја категорија учествува со 20 отсто во вкупниот резултат.
Истражувањето се потпира на податоци од различни организации и бази на податоци – вклучувајќи ги Светската здравствена организација, Глобалниот индекс на мир (Global Peace Index), IQAir, Индексот за еколошки перформанси на Универзитетот Јејл, Numbeo и Ookla Speedtest – како и на сопствените истражувања на Nomad Capitalist за даноците, рангирањето на пасошите и индексите на слобода. Истражувачите ги претворија податоците од овие разновидни извори во оценки на скала од 100 поени. Потоа, тие го пресметаа просекот од петте категории за да ги одредат конечните рангирања. Овие 63 дестинации беа избрани врз основа на места што го привлекуваат интересот на публиката на Nomad Capitalist.
Монако го зазема првото место, веднаш проследено од Андора и Обединетите Арапски Емирати. Европските дестинации доминираат во горниот дел од листата, при што Малта, Португалија и Кипар исто така се наоѓаат меѓу првите шест. За разлика од нив, Соединетите Држави се наоѓаат на изненадувачки ниското 54-то место од вкупно 63 дестинации.
Иако Монако е прворангирано во вкупниот поредок, разликата меѓу водечките дестинации е исклучително мала. Монако, Андора и ОАЕ ги делат само 0,74 поени, што значи дека тие се практично изедначени. Монако води според квалитетот на живот (100 поени), Андора според безбедноста и слободата (96), а ОАЕ според даночниот систем (96). Со разлика од само 0,74 поени меѓу овие три дестинации, изборот зависи од тоа што ви е приоритет: најдобра инфраструктура, сеопфатна понуда без значителни недостатоци или најниско даночно оптоварување.
Сепак, овие високо рангирани дестинации не се нужно места во кои е лесно да се преселите. Според Гелбахијани, Обединетите Арапски Емирати (ОАЕ) нудат десетгодишна „Златна виза“ преку одредени инвестициски програми. Тие вклучуваат инвестиции во недвижен имот со почетна вредност од приближно 545.000 долари.
Андора нуди можност за добивање престој, под услов да се инвестираат најмалку еден милион евра во средства во рамките на земјата. Во Монако, за аплицирање за престој обично се бара претходно депонирање значителна сума пари во локална банка.
Еден од најинтересните наоди во Nomad Lifestyle Index 2026 е тоа што ниту една дестинација не доминира во сите пет категории. Всушност, секоја категорија има различен победник.
Панама е на прво место според природната средина и климата, со резултат од 73,6 поени. Според критериумите користени во индексот, оваа централноамериканска земја се одликува со чист воздух и релативно мала долгорочна изложеност на екстремни временски услови. Сепак, и покрај природните предности и високиот резултат од 83 поени во даночната категорија, Панама остана веднаш надвор од првите 10, заземајќи го 11-тото место во вкупниот пласман.
ОАЕ го заземаат првото место во даночната категорија, со резултат од 96 поени. Поволниот даночен режим, отсуството на данок на личен доход и мрежата на договори за избегнување двојно оданочување ги прават овие локации особено привлечни за претприемачите и инвеститорите.
Малта е на прво место во категоријата за престој и пристап, со 95 поени. Оваа медитеранска островска држава се одликува со високо рангиран пасош, повеќекратни можности за добивање престој и релативно достапен пат до државјанство, во споредба со дестинациите кои бараат значително подолг период на престој.
Извештајот наведува пет достапни начини за добивање престој и временска рамка од пет години за стекнување државјанство преку натурализација, иако конкретните барања варираат во зависност од поединечниот случај. Андора има највисок резултат во однос на безбедноста и слободата – 96 поени – со што се наоѓа пред Швајцарија (92,7 поени) и Лихтенштајн (92,1 поен). Овој резултат помага да се објасни зошто оваа мала европска кнежевина го зазема второто место во вкупниот пласман, и покрај релативно скромниот резултат во однос на можностите за стекнување престој.
Од друга страна, Монако доминира во категоријата за квалитет на живот и инфраструктура, постигнувајќи совршен резултат од 100 поени. Оваа категорија опфаќа показатели како што се очекуваниот животен век, достапноста до интернет, трошоците за живот и пошироки индикатори за квалитетот на живот.
За поединците од деловниот свет, даноците и можноста за законско регулирање на престојот често се особено значајни фактори. Гелбахијани препорачува да се даде предност на дестинации што комбинираат поволна даночна политика со реални можности за добивање престој. Сингапур и Хонгконг особено се издвојуваат по своите високи резултати во даночната категорија. Во вкупниот пласман, тие го заземаат седмото, односно шеснаесеттото место. Малта и Кипар нудат алтернативи за оние што бараат база во Европа.
Топ 20 најдобри места за живеење во 2026 година:
- Монако
- Андора
- Обединети Арапски Емирати
- Малта
- Португалија
- Кипар
- Сингапур
- Кајмански Острови
- Нов Зеланд
- Швајцарија
- Панама
- Сејшели
- Ирска
- Лихтенштајн
- Чешка Република
- Хонгконг
- Маурициус
- Естонија
- Луксембург
- Латвија
(Forbes.hr)
(фото: Pexels/Min An)
