Nvidia најави инвестиција од 3 милијарди долари во неодамнешната емисија на акции на Meta Platforms, како дел од проширеното партнерство фокусирано на линијата модели за вештачка интелигенција на Meta, наречена Muse. Оваа одлука доаѓа по најавата на Meta дека планира да собере 95 милијарди долари за финансирање на развојот на својата инфраструктура за вештачка интелигенција.
Во заедничка изјава двете компании наведоа дека ќе соработуваат на подобрување на перформансите при обуката и извршувањето (инференцијата) на моделите Muse на Meta.
Според Investing.com, Meta изјави дека има намера да го прошири распоредувањето на инфраструктурата на Nvidia во своите податочни центри – вклучително и употребата на процесорите Vera Rubin и Vera – за да ги напојува своите агенти за вештачка интелигенција.
Компанијата, исто така, ќе ја имплементира мрежната технологија на Nvidia.
„Nvidia и Meta го прошируваат своето партнерство за да ја оптимизираат компјутерската инфраструктура, од почеток до крај, за способни, ефикасни и безбедни агенти за вештачка интелигенција“, изјави извршниот директор на Nvidia, Џенсен Хуанг.
Лојд Волмсли, аналитичар во брокерската куќа Mizuho, во белешка до инвеститорите истакна дека финансирањето преку капитал (акции) на Meta ќе помогне да се намали дел од притисокот врз акциите на компанијата.
„Инвеститорите стравуваа дека ќе мора да чекаат до јануари 2027 година за воспоставување на акциите од класа C. Ова забрзување на процесот им оди во прилог“, изјави Волмсли.
Соработката доаѓа откако моделите за вештачка интелигенција Muse на Meta, а особено нејзините Muse агенти, наидоа на позитивен прием кај корисниците, при што апликацијата Muse Agent стана една од најпреземаните само една недела по нејзиното лансирање.
(B92)
(фото: Pexels/Uma Media)
