Саудиска Арабија сега е дом на највисокaтa и најбрзaтa луда железница во светот, откако American Six Flags го отвори својот прв тематски парк надвор од Северна Америка – и тоа во кралството.
Успешната изградба на забавниот парк Six Flags Qiddiya City, вреден 1 милијарда долари, е чекор напред за саудиските власти откако серија футуристички мегапроекти беа погодени од одложувања и проблеми, пишува Financial Times.
Паркот е првиот оперативен дел од Qiddiya, огромен забавен и спортски комплекс лоциран на пустинските планински карпи на периферијата на Ријад. Се очекува локацијата во иднина да вклучува патека за Формула 1, стадион за Светското првенство и центар за сценски уметности.
Qiddiya е во сопственост на Јавниот инвестициски фонд (PIF), суверениот фонд за богатство на Саудиска Арабија, кој крунскиот принц Мохамед бин Салман го користи како главно средство за спроведување на амбициозна програма за реформи. Реформите имаат за цел да ја диверзифицираат саудиската економија и да ја намалат нејзината зависност од приходите од нафта.
Комплексот е еден од петте мегапроекти дизајнирани да помогнат во трансформацијата на економијата на земјата преку инвестирање во нови сектори, како што се туризмот и забавата. Бидејќи финансиите на Саудиска Арабија се под притисок во последните години поради пониските цени на нафтата, владата беше принудена да ги ревидира своите планови и да ги преиспита приоритетите за трошење.
Во исто време, кралството е под притисок да ги исполни роковите пред да биде домаќин на големи меѓународни настани, вклучувајќи ги Експо 2030 и Светското првенство во фудбал во 2034 година.
Откако неколку од мегапроектите на PIF, вклучувајќи го и неговиот водечки футуристички проект Neom, беа погодени од доцнења и пречекорувања на буџетот, фондот минатата година објави дека ќе отпише 8 милијарди долари од нивната вредност до крајот на 2024 година.
Саудискиот крал Салман го претстави проектот Qiddiya во 2018 година, а првата фаза требаше да се отвори во 2022 година. И покрај доцнењето, саудиските власти веруваат дека отворањето на паркот ќе помогне во привлекувањето туристи и ќе ги охрабри граѓаните да трошат повеќе во земјата, а не во странство.
„Економскиот модел на Qiddiya се базира на трошењето на посетителите“, рече Абдула ал-Давуд, извршен директор на компанијата за инвестиции Qiddiya, која е поддржана од PIF.
Тој додаде дека се очекува проектот да создаде околу 7.000 работни места оваа година и да придонесе со 2,5 милијарди ријали (686 милиони долари) во БДП на кралството.
До 2030 година се очекува тој број да се зголеми на 85.000 работни места, придонесувајќи со 44 милијарди ријали во БДП, како што ќе се завршат другите делови од проектот. Забавниот парк Six Flags веќе стана исклучително популарен кај локалното население. Илјадници Саудијци ја платија таксата за влез за возрасни од 325 ријали (87 долари) откако се отвори на Нова Година.
Омар ал-Араби, кој живеел во Калифорнија и често ги посетувал Дизниленд и Universal Studios во САД, минатата недела ги донесе своите три деца, на возраст од пет до 13 години, во Six Flags Qiddiya City. И покрај гужвите, рече тој, повеќето возења траеле помеѓу 15 и 20 минути за да се влезе. Исклучок е лудата железница Falcons Flight, која траела повеќе од еден час.
(Kamatica)
