TikTok ќе започне со воведување на нова технологија за детекција на возраст низ цела Европа во наредните недели, соопшти компанијата во петокoт, бидејќи платформата во сопственост на ByteDance се соочува со регулаторен притисок да идентификува и да отстрани сметки од деца под 13 години.
Системот ќе анализира информации за профилот, објавени видеа и модели на однесување за да процени дали лицето зад одредена сметка е малолетно.
На тензиите дополнително придонесува и фактот дека судија во американската држава Делавер во петок ќе го разгледа барањето на TikTok за отфрлање на тужбата поднесена минатата година од родителите на пет британски деца кои починаа наводно додека изведувале видеа со „шеги“ и „предизвици“.
Во тужбата се тврди дека алгоритмите на TikTok промовирале опасна содржина за децата, вклучително и таканаречен „предизвик за затемнување“ што поттикнувал задушување.
„ByteDance им наштетил на овие деца откако менаџментот знаел дека нивните програмски одлуки водат до случајна смрт на деца“, се наведува во тужбата поднесена во Делавер.
Некои од децата беа под 13 години.
„Им изразуваме најдлабоко сочувство на овие семејства“, изјави портпаролот на TikTok, додавајќи дека тие строго забрануваат содржина што промовира или охрабрува опасно однесување.
(Reuters/Klix.ba)
