Светот мора да се подготви за „значително повисоки“ цени на енергијата доколку не се отвори Ормутскиот теснец, предупреди шефот на Меѓународната агенција за енергетика (ИЕА), Фатих Бирол.
Бирол додаде дека, дури и ако тој клучен морски пат се отвори повторно, цените на енергијата нема веднаш да се „вратат во нормала“.
„Треба да се подготвиме за нестабилни пазари во подолг период“, изјави тој за Бирол за швајцарскиот весник „Ноје Цирхер Цајтунг“.
Тој, исто така, предупреди дека порастот на цените ќе се почувствува низ целиот свет и дека пазарите досега го потценувале влијанието на војната. Причината за ова, наведува тој, е фактот дека танкерите за нафта и гас кои веќе беа на пат пред почетокот на конфликтот, во меѓувреме пристигнаа на своите одредишта. Овие испораки досега го „омекнаа ефектот“ од војната, но во март не беа натоварени нови танкери, рече тој.
Долго закрепнување
Шефот на ИЕА проценува дека ќе бидат потребни околу две години за да се врати производството на енергија изгубено на Блискиот Исток по војната со Иран, истакнувајќи дека темпото на закрепнување ќе варира од земја до земја.
„На пример, во Ирак, закрепнувањето ќе трае многу подолго отколку во Саудиска Арабија. Сепак, проценуваме дека ќе бидат потребни вкупно околу две години за да се вратиме на нивоата пред војната“, рече тој.
Бирол истакна дека со години предупредува за големата зависност од Ормутскиот теснец и дека глобалната економија, „економија вредна 110 милијарди долари“, може да биде „заложник на неколку вооружени луѓе“. „Сега гледаме колку бил реален тој ризик“, заклучи тој.
Еден ден претходно, во разговор со Асошиејтед Прес (АП), Бирол процени дека Европа има „можеби шест недели“ гориво за авијација, нарекувајќи ја сегашната ситуација „најголемата енергетска криза со која некогаш сме се соочиле“.
(Investitor.me)
Фото – Wikimedia
