Претседателката на Европската централна банка (ЕЦБ), Кристин Лагард, денес предупреди дека Европа не може да си дозволи да ја пропушти револуцијата на вештачката интелигенција, бидејќи моделот на економски раст на континентот се соочува со растечки притисок. Таа ја повика Европа подобро да го искористи својот единствен пазар и потенцијалот за развој на нови технологии.
Трката со вештачката интелигенција ја водат САД и Кина, чии компании развиваат најнапредни јазични модели и брзо градат огромни нови центри за податоци.
„Европа во голема мера ја пропушти првата дигитална револуција, бидејќи економските придобивки од широката употреба на информациските и комуникациските технологии непропорционално се прелеаја во други региони. Не можеме да си дозволиме да го повториме ова искуство со вештачката интелигенција, втората дигитална револуција“, рече Лагард на настан на Светскиот економски форум во Женева
Додека европските компании инвестираат многу во вештачката интелигенција, тие се попречени во еврозоната да ги прошират своите операции, рече таа.
„Фрагментацијата“ на пазарот на ЕУ значи дека компаниите не се доволно конкурентни во еврозоната, а исто така им е тешко да соберат финансии, особено во споредба со нивните американски конкуренти, рече Лагард. Како резултат на тоа, помалку компании растат до глобална големина, а новите технологии се шират побавно.
Таа забележа дека Европа долго време има корист од светскиот поредок базиран на три столба: американски безбедносни гаранции, евтина енергија и пораст на глобалната трговија. Но, во променливото меѓународно опкружување сите три столба слабеат, рече таа. Само минатата година, на пример, беа воведени повеќе од 2.500 трговски ограничувања низ целиот свет, Кина се натпреварува со Европа во сè поголем број сектори, пристапот до евтина енергија завршува, а светскиот поредок се урива.
Овие промени, рече таа, покажуваат дека повоениот модел на раст на Европа еродира. „И малку е веројатно дека ќе се врати во формата што ја знаевме некогаш“, додаде таа.
Сепак, Европа сè уште има важни силни страни на кои може да се гради – има најголема мрежа на трговски договори, одржува производствен потенцијал од светска класа и висококвалификувана работна сила и е интегриран пазар за 450 милиони потрошувачи, поголем од која било друга развиена економија.
Лагард верува дека ЕУ е идеално позиционирана за целосно да го искористи потенцијалот на новите технологии. Околу шест проценти од светската популација живее во неа, 15 проценти од сите научници и речиси една петтина од најцитираните научни публикации во светот, рече таа.
(SEEBiz.eu)
(фото: Wikimedia)
