Паметните телефони се еден од најголемите предизвици со кои се соочуваат децата денес бидејќи ги вовлекуваат во волшебни дигитални светови кои ги задржуваат во затворени простории, наместо да го прават она што сите деца треба да го прават: да излезат во природа и да го истражуваат светот околу себе.
Американскиот стартап Freckle смета дека целосната забрана за телефони не е единствениот начин да се заштитат децата од опасностите на дигиталната средина. Затоа, тие развија уред – претставен како „телефон за деца“ – дизајниран за авантури во реалниот свет, како што е прикажано во ова видео.
Во срцето на уредот е оперативниот систем на Freckle, наречен ClayOS. Тој се прилагодува на потребите на секое дете и се развива како што тие растат. Исто така, постои и придружна апликација што им овозможува на родителите да го одредуваат темпото и постепено да воведуваат нови функции.
ClayOS нема продавница за апликации, отворен пристап до интернет, апликации за видео-стриминг што создаваат зависност или платформи за социјални мрежи, туку се фокусира на функции што децата навистина би ги користеле додека си играат надвор. Тие можат да фотографираат предмети – кои Freckle потоа ги опишува со помош на вештачка интелигенција – или да поставуваат општи прашања за тоа како функционира светот.
Уредот вклучува мини-мапа за помош при навигација, функција „воки-токи“ за разговор со пријатели во близина кои исто така имаат уред Freckle, како и основна функција за плаќање со допир за купување ужина или користење јавен превоз.
Родителите исто така можат да креираат приспособени задачи – како на пример, да побараат од децата да фотографираат одредени цвеќиња надвор – или да се потпрат на вградените активности на уредот.
Децата можат да го користат Freckle за повици и испраќање пораки, но само до ограничен број луѓе одредени од нивните родители. Самиот уред е изработен така што издржува падови, удари и други незгоди вообичаени за детството, а компанијата нуди и футрола за носење со ремче.
Тие исто така истакнуваат дека екранот од 3,1 инч на Freckle е доволно голем за прикажување на важни информации, без притоа премногу да му го одвлекува вниманието на детето.
Иако родителите денес често не им дозволуваат на своите деца да излегуваат сами, треба да се запрашаме што сме правеле ние кога сме биле деца. Зар не беше нормално да излезеш од дома и да не се појавиш сè до ручек или додека родител не те повика да се вратиш?
Првата серија уреди Freckle ќе биде испорачана во декември 2026 година, по цена од 199 долари и со месечна претплата за услугата од 25 долари – иако засега ова е достапно само во САД.
(Vidi.hr)
(фото: PickPik)
